Shimura ni-indefinite leave isip presidente sa LMP

CEBU, Philippines — Ang bag-ong napili pagk- presidente sa League of Municipalities of the Philippines (LMP)-Cebu nga si Daanbantayan Mayor Sun Shimura niduso og indefinite leave of absence isip LMP president.

Si Shimura nagpadala kini og suwat ngadto kang Gobernador Gwendolyn Garcia nga nagkanayon daghan ang mga atimaon karon sa ilang lungsod human nga duha ka opisyal sa LGU ang nitaliwan ug aduna usab siya’y atimanon nga personal concern hinungdan nga ni-leave una siya isip presidente sa LMP.

“In view of the pressing concerns in my municipality due to untimely demise of my budget officer and SB Member including the health condition of my father who is based in Japan and suffering for stage 3 cancer, which from time to time necessitates my presence, I most respectfully manifest my intention to file for an indefinite leave of absence as LMP President for Cebu Province until further notice”, matud ni Shimura sa iyang suwat ngadto kang Garcia nga penetsahan niadtong Hulyo 21, 2022.

Niadtong Hulyo 17, 2022, ang budget officer sa lungsod nga si Marissa Monterde Cruz nitaliwan human kini nahulog sa manhole ug nalumos diha sa Lungsod sa Medellin.

Kagahapon, ang LGU nipahibalo usab sa pagtaliwan sa ilang konsehal nga si Juanito Ybañez niadtong Hulyo 21, 2022 human kini giatake sa kasing-kasing.  Ug gumikan niini, ang bise presidente sa liga ang temporaryong mohimo sa mga responsibilidad ni Shimura isip presidente sa LMP-Cebu.

Atol sa eleksiyon sa LMP niadtong niaging semena si Consolacion Mayor Teresa “Nene” Alegado maoy napili isip vice president for internal ug external vice president usab  si Sogod Mayor Lissa Marie “Monyeen” Durano Streegan. — (/BDB) (BANAT NEWS)