OBO: Pag-isyu sa building permit dili na molapas sa usa ka oras

CEBU, Philippines — Gipaniguro sa Office of the Building Official (OBO) sa Dakbayan sa Sugbo nga mapaspasan na ang pag-isyu og building permit ug target niini nga dili molapas og usa ka oras.

Base sa taho sa Cebu City Public Information Office giingong pinasubay usab kini sa kamandoan ni Mayor Michael Rama.

“We are happy to announce to the public, sa mga architects and engineers nga ang OBO Cebu City nag-implement na gyud ta og less than an hour issuance of building permits,” matud ni Florante Catalan, hepe sa OBO.

Ang mga aplikante kinahanglang mag-andam sa kompletong dokumento subay sa minimum nga mga sumbanan ubos sa National Building Code, Implementing Rules and Regulations niini ug ang mga ordinansa sa siyudad.

Kinahanglang ibutang nila sa flash drive ang ilang gikinahanglang building plans ingon man mga dokumento ug ipresentar kini sa OBO aron maproseso.

Human niini, dili na moabot og usa ka oras ang pagpaabot sa pag-isyu sa ilang building permit.

Ang maong polisiya nahimuong posible pinaagi sa OBO Information System (IS) Version 3 nga gimugna sa buhatan sa Management Information and Computer Services (MICS) sa dakbayan.

Matud ni Catalan nga sa higayon nga ma-encode na ang mga file sa ilang sestema awtomatiko kini nga ipakaylap sa tanang mga section head.

Sa maong kalamboan, giawhag sa OBO ang tanang developers, architects ug engineers sa pagsiguro nga makuha dayon nila ang ilang building permit sa dili pa ang bisan unsang construction activities aron malikayan ang silot.

Dugang ni Catalan nga ang mga personnel sa OBO kanunay nga gipahinumdoman nga dili mangayo o modawat og mga regalo gikan sa mga kliyente sa tibuok proseso sa aplikasyon. (BANAT NEWS)