Barko nga gi-angkorahe nasunog
CEBU, Philippines — Duha ka mga crew ang naangol sa nasunog nga barko nga Trans Asia 1 nga giangkurahe sa kadagatan sa Sitio Lupa, sa Barangay Punta Engaño sa Siyudad sa Lapu-Lapu alas-10 pasado ang takna sa miaging Biyernes sa gabii.
Si Fire Inspector Diomed Alburo sa Lapu-Lapu City Fire District Office (LCFDO) miila sa duha ka mga crew nga sila si Jeryl Joy Narte, 23, nga giingong nakasinati og kalisod sa pagginhawa ug Judel Cabahug, 22, nga nakabaton usab og first degree burn sa iyang bukobuko.
Matud pa ni Alburo nga ang maong barko nga nasunog ang gipanag- iya kini sa Trans Asia Shipping Lines Inc. ug kini padayong giayo sugod pa niadtong tuig 2019.
Dugang pa ni Alburo nga ang mga sakop sa Lapu-Lapu Rescue Team dali usab miluwas 11 pa ka mga crew sa maong barko nga nasunog.
Si Alburo miingon nga dugang pa nga imbestigasyon ang ilang pagahimoon sa pagsuta sa hinungdan niini. (CEBU NEWS)
- Latest
