CEBU, Philippines — Niabot ngadto sa 22 ka sakyanan ang gi-clamp sa Cebu City Transportation Office atol sa ilahang operasyon niadtong Martes sa gabii diha sa pipila ka mga kadalanan sa siyudad tungod sa night illegal parking.
Ang kagamhanan sa Siyudad sa Sugbo adunay ordinansa kalabot niini nga mao ang City Ordinance 2004 nga ang tumong malikayan ang pagpataka og parking panahon sa kagabhion aron dili makabalda sa kadalanan ilabi na kon adunay emerhensiya.
Ang CCTO nakadawat og reklamo nga daghang mag-parking nga mga sakyanan panahon sa kagabhion diha sa Molave, Sitio Pangutana, atubangan nga bahin sa Lahug Barangay Hall, Lower Nivel Hills, Salinas Drive, Barangay Camputhaw, dalan Gorordo Avenue, Llorente ug G. Garcia Street.
Nanawagan ang CCTO sa katawhan nga tumanon ang mga signage nga makita diha sa kadalanan ilabi na sa mga dagkong dalan aron dili ma-clamp ang sakyana diin makamulta na hinuon og P1,000 sa kalapasan sa overnight parking ug laing P500 sa clamping.
“Dili ma-release ilang awto, dili gyud ma-release ang ilahang vehicle kay ang clamping man gud you really have to settle it”, matud ni Paul Gotiong, pangulo sa CCTO.
Abli ang buhatan sa CCTO gikan sa alas 8:00 sa buntag hangtud sa alas 5:00 sa hapon sa adlaw’ng Lunes hangtud sa Biyernes diha sa second floor sa Ramos Public Market alang niadtong mga mo-settle sa ilahang obligasyon human na-clamp ang sakyanan. BDB (BANATNEWS)