P8 milyones gibana-banang danyos sa sunog sa DOLE building

CEBU, Philippines — Gibana-banang niabot ngadto sa P8 milyones ang danyos sa nahitabong sunog kagahapon sa hapon diha sa usa ka andana sa building sa Department of Labor and Employment (DOLE)-7  nga nahimutang diha sa Barangay Kamputhaw, Dakbayan sa Sugbo.

Ang kayo sa sunog niulbo pasado ala1:00 sa hapon diha sa buhatan sa Overseas Workers Welfare Administration (OWWA) nga nahimutang diha sa ikaduhang andana sa building. Ang maong sunod gipaubos sa unang alarma pagka-ala 1:11 sa hapon ug nakontrolar kini human sa 30 minutos ug na-fire out pagka-ala 1:41 sa hapon.

Base sa pasiunang taho sa Cebu City Fire Office nga ang apektado sa maong sunog adunay gilapdon nga 200 square meters ug gibana-banang niabot ngadto sa P8 milyones ang danyos hinuon walay gikatahon naangol sa maong insidente.

Niabot ngadto sa 49 ka fire trucks ang niresponde sa insidente nga gilangkuban sa 10 ka fire engines, us aka water tender ug pipila ka Fire Volunteer Brigades.

Sa oras sa pagsuwat niining balita gilantaw sa imbestigador sa kabomberohan nga faulty electrical wirings ang posibleng hinungdan sa sunog. (Rubie Mae T. Sollano/BDB)

Kapitolyo nagplanong modawat na usab og inmates diha sa CPDRC

Giplanohan sa Probinsiya Sugbo nga modawat na usab og mga priso gikan sa mga municipal jail padulong sa Cebu Provincial Detention and Rehabilitation Center (CPDRC).

Kini human nga nimenos na ang inmates diha sa maong prisohan.

Apan si Gobernador Gwendolyn Garcia nagkanayon nga ang pagdawat og inmates ubos sa pipila ka kondisyon.

Matud ni Garcia nga dili siya buot nga masubli pa ang nahitabo kaniadto nga maghuot na usab ang CPDRC.

Susihon na nila karon ang status sa mga kaso sa inmates.

Sa pagkakaron anaa na lang sa 900 ang gidaghanon sa inmates sa CPDRC gikan sa dul-an 4,000 sa nilabay’ng mga tuig. Ang CPDRC aduna kini 1,500 nga kapasidad.

Sa paglingkod ni Garcia sa posisyon niadtong tuig 2019, usa sa iyang gihimo mao ang pagpatuman og mga programa aron makuhaan ang gidaghanon sa inmates  diha sa CPDRC diin nakig-alayon ang kapitolyo sa Integrated Bar of the Philippines (IPB)-Cebu  aron paspas ang disposition sa kaso sa mga priso.

Giplanohan usab nga ibalik ang naila na kaayo nga Cebu dancing inmates sa CPDRC.

Gibutyag ni Garcia nga nakig-alayon na sila sa dance sports choreographer nga si Edward Hayco kalabot niini.

Gilaoman nga karong tuiga mabalik ang dancing inmates.

Laing plano ni Garcia mao ang pagbalik sa savings account sa inmates diin matag usa adunay passbook.

Ang Kapitolyo gikatakdang makig-alayon ngadto sa Cooperative Bank of Cebu.

Ug hatagan usab og bag-ong uniform ang inmates sa maong jail facility ug ingon man binhi aron makapananom diha sulod sa pasilidad. BDB (BANATNEWS)