Nanghulgang mopakatap sa ilang sex video sa kapuyo, sikop

CEBU, Philippines — Gidakop ang usa ka 37-anyos nga lalaking gialegar nga nihulga nga ipakatap ang sex video sa iyang kapuyo nga mireklamo diha sa Barangay Apas, sa Dakbayan sa Sugbu kagahapong adlawa Biyernes sa buntag.

Ang babaye nireklamo sa barangay ug mialegar nga gitionan kini og gunting sa suspek sa dihang nibalibad siya nga makighilawas. Nihulga sab ang suspek nga ipakatap niini sa internet ang ilang sex video.

Ang maong lalaki nga tagoon lang sa pangalan, Cardo, temporaryong nagpuyo sa maong lugar ug lumad nga taga probinsya sa Bohol ug dispatcher sa mga container van.

Ang reklamante miingon nga dili na niini gusto ang lalaki ug labaw nang di na siya makighilawas niini.

Dihang gitionan siya og gunting, diha na siya nabalaka sa iyang seguridad maong nidangop siya sa barangay.

Sumala pa ni Willie Torres, VAWC sa Barangay Apas, giadto sa ilang mga tawo ang maong gireklamo.

Apan samtang kini gikuptan sa mga tanod, nakuha sa video ang pagbanos-banos og kulata kaniya sa mga tawo sa lugar tungod sa kalagot sa iyang gihimo.

Dugang pa ni Torres nga karong adlaw nga Lunes gipaabot nga mopasaka og kaso batok sa maong dinakpan.

Ang suspek sa iyang bahin nitug-an ug niangkon nga aduna gayud silay sex video sa maong babaye.

Gihadlok lang niya kini tungod sa iyang kalagot nga wala kini mosulti nga nagkabalik kini sa iyang uyab nga amahan sa anak niini ug ang dili niya madawat nga magkabuwag sila.

Dako iyang pagtuo nga adunay pagtugot sa babaye sa dihang nag-video sila samtang nag-sex.

Gitug-an usab sa dinakpan nga wala siyay gimolestiya lain ug ang iyang sayop lang mao ang pagpanghulga sa pagpakatap sa maong sex video. (BANAT NEWS)