Chan supak sa LNG kong makadaot sa panglawas

CEBU, Philippines — Gipadayag ni Mayor Junard “Ahong” Chan ang pasupak sa katukoran sa 600 Megawatts nga Liquefied Natural Gas (LNG) kon makadaot kini sa mga panglawas sa mga molupyo sa lugar.

Matud ni Chan nga kini kon mogawas sa mga pagtuon nga pagahimuon nga makadaot sa panglawas ug kalikupan dili siya mo uyon niini.

Si Chan niluwat sa maong pamahayag isip reaksiyon sa kabalaka sa mga civic group nga gilangkuban sa Philippine Movements for Climate Justice  (PMCJ) Cebu Chapter, Center for Energy Development  nga naghimo sa ilang protesta niadtong Hunyo 5, 2022 diha sa Barangay Poblacion nunot sa pagtimaan sa Environment Day sa maong adlaw.

Gipasabot ni Chan nga hatagan una niya og igong panahon ang mga nagtinguha sa katukoran sa maong planta nga matubag ug mapasabot ang mga gipadayag nga mga kabalaka sa mga environmentalist ug stakeholders.

Gibutyag ni Chan nga kasamtangan gihimo na niya ang pagpakighinabi sa project proponent niini.

Niining maong lakang nga iyang gihimo gitakda og balik ang public hearing sulod sa tulo ka bulan. (BANAT NEWS)