CEBU, Philippines — Duha ang namatay dihang ang motorsiklo nga ilang giluwanan gikatahong kalit lang gidumbol sa nagsunod kanila nga Ceres bus diha sa dalan national sa Barangay Dunggoan sa Siyudad sa Danao alas- 7 pasado Martes sa gabii.
Si Police Master Ronald Gomez nga maoy traffic investigator sa Danao City Police Station miila sa mga biktima nga sila si Christian Warren Perez Bedona,
35, ug angkas niyang si Jephy Navales, 37, pulos molupyo sa Barangay Suba sa maong siyudad. Matud pa ni Gomez nga nagdagan ang motorsiklong giluwanan sa mga biktima sa karsada sa dihang matud pa gidasmagan sa nagsunod bus nga gimaneho ni Ranilo dela Cruz Miscala, 28, taga Barangay Victoria sa Lungsod sa San Remigio. Matud pa ni Gomez nga gumikan sa kusog nga impact sa pagdasmag nalabay ang duha ug nalukotlukot ang giluwanan nilang motorsiklo. Gidala pa unta ang mga biktima sa Danao Provincial Hospital apan gideklarar sa mga doktor nga dead on arrival.
Ang driver sa bus temporaryo karong gitanggong sa detention cell ug gikatakdang pasakaan og kaso . (BANAT NEWS)