CEBU, Philippines — Gipahibawo ni Atty. Eleno Andales, kapitan sa Barangay Punta Princesa nga sa pakig-meeting nila sa mga lot owners gikan sa Sitio Tuburan, Arca, Enriquez, Trinidad ug Little Bamboo nga naigo sa dakong sunog giingong wala ray nisupak sa plano sa kagamhanan sa Siyudad sa Sugbo ug sa barangay. Sayo pa, giplanohan sa kagamhanan sa siyudad ug sa barangay nga ipaubos sa re-blocking ang lugar ug kinahanglan nga i-ground zero kini.
Matud ni Andales nga kon ideklarar na sa Office of the Building Officials (OBO) nga dili na luwas ang mga istraktura sa dapit sugdan sa barangay ang pag-bulldoze sa mga nahibilin nga istraktura aron i-ground zero.
Base sa record sa barangay niabot sa 800 ka pamilya, 700 ka nanag-iya og istraktura ug 4,000 ka indibidwal ang naapektohan sa nahitabong sunog niadtong Sabado.
Nunot niini, nag-abot-abot ang mga hinabang alang sa mga biktima sa sunog sama sa used clothing ug uban pa.
Nihangyo si Andales sa mga tawo nga kun mahimo pagkaon ug mga toiletries ang idonar alang sa mga biktima sa
sunog tungod kay daghan na kaayo nga mga sinina ug gani ang uban mausik lang tungod kay dili magamit ug mapugos sila og labay kay magtipun-og naman.
Subay niini, si Dr. Jeffrey Ibones, officer-in- harge sa Cebu City Health Department nibutyag nga 100 ka
pasyente ang ilang giatiman diha sa Punta Elementary School evacuation center nga gipanghilantan, gipang-ubo ug adunay mga nangasamad.
Gipabisita usab sa Cebu City Health Department ang ilang mga sanitary inspectors sa evacuation center aron
matan-aw usab ang ilang tubig nga gigamit aron malikayan ang skin infection. Nunot niini, ang Cebu Caritas sa Archdiocese of Cebu mopaambit og mga ayuda ngadto sa mga nabiktima sa sunog.
Si Padre Alex Cola, presidente sa Cebu Caritas Inc. ug kasamtangan nga chairman sa commission on service
nagkanayon nga mopaambit sila og mga kaldero, kaha, foam, higdaan, plato, kutsara ug food items ngadto sa mga nabiktima sa sunog.
Matud ni Cola nga ipaagi nila ang maong hinabang sa Lourdes Parish pinaagi sa Parish Caritas aron ang tananmahatagan. — Rowena D. Capistrano/BDB (BANAT NEWS)