Nag-birthday sa evacuation site

CEBU, Philippines — Bisan paman sa mga problema ug trahedyang giagian karon sa usa ka pamilya tungod sa sunog sa Brgy. Punta Princesa, Cebu City usa ka dalagita nga usa sa mga bakwit ang niselebrar gihapon adlaw niyang natawhan diha sa evacuation site kagahapon.

Gipakita sa pamilyang Rabe nga mga residente sa Sitio Trinidad kansang panimalay usa sa mga hingpit nga naugdaw nga bisan sa mga bati nga panghitabo duna gihapoy angay ipasalamat.

Si Criselda Rabe, naabtan sa Banat News nga nagdala og spaghetti, fried chicken ug cake nga iyang ‘hikay’ para sa iyang 13-anyos nga anak nga si Crislyn kay birthday niini.

Sigon ni Criselda nga pinaagi sab sa tabang sa mga kabanay niini nakapalit sila og cake ug uban pang pagkaon alang sa kalipay sa iyang anak.

Dungan sa pagtibi ug pagluha iyang giangkon nga naglisod gyud sila karon ilabi na nga dili pa lang sad dugay nga namatay ang amahan sa iyang mga anak niadtong Mayo 21 ning tuiga.

“Lisod, sakit uy, unya bag-o pa ming namatyan, lisod kay kahimtang diri. Manawagan mi og tabang sa gobiyerno, nga mahatagan mi og ayuda kay sunod-sunod among problema, paet kay kahimtang namo diri, dili lalim tungod sa kadaghan ba,” ni Criselda pa.

Panghinaot lang sa nag-birthday nga si Crislyn kinsa Grade 9 na karon nga makahuman siya og eskwela, matabangan ang iyahang mama ug makatukod sila og balik sa ilahang balay. —IBM (BANATNEWS)