CEBU, Philippines — Dili ka lingkod sa katungdanan ug dili usab mahimong makadagan pag-usab ang winning ug non-winning candidates sa niaging eleksiyon kon dili kini makasumiter sa ilahang Statement of Contribution and Expenditures (SOCE).
Kini ang gibutyag ni Marilou Paredes, Cebu City South District Election Officer. Nasayran nga kagahapon
ang kataposang adlaw sa pagsumiter sa SOCE.
Matud ni Paredes nga sa Cebu City South District 11 pa lang ka winning ug non-winning candidates ang
nisumiter sa ilahang SOCE diha sa buhatan sa Comelec.
Gilangkuban kini nila ni Josephine Blanche “Pie” Abella, James Anthony Cuenco, Jocelyn Pesquera, Renato
Osmeña Jr., Roberto Cabarrubias, Cornelio Jaca, Omar Kintanar, Romonito Alcoseba, Pancrasio Esparis, Phillip
Zafra ug Donaldo Hontiveros.
Samtang sa north district sila si Gian Aznar, Mary Delos Santos, David Tumulak, Rachel Marguerite del
Mar, Melvin Legaspi, Reynaldo Lauron, Richard Yap, Pastor Alcover Jr., Joel Garganera, Noel Wenceslao, Alvin
Dizon, Franklyn Ong, Jerry Guardo, Alvin Arcilla, Mayor Michael Rama, Winston Pepito, Sisinio Andales, Edgardo
Jaypee Labella II, Peter Mancao, Leo Japson ug Nestor Achival.
Nagkanayon si Paredes wala pa sila’y nadawat nga direktiba gikan sa ilang labaw kabahin sa extension sa pagsumiter sa SOCE.
Kagahapon, ang COMELEC Cebu City nagpaabot hangtud sa alas 5:00 sa hapon alang sa mga wala pa naka-file sa ilahang SOCE.
Subay niini, tulo ka kandidato sa Probinsiya sa Sugbo ang nigasto og sobra P1milyon atol sa ilang pangampaniya sa nilabay’ng eleksiyon.
Base sa pasiuna nga listahan sa mga nakasumiter og SOCE si Gobernador Gwendolyn Garcia nakagasto og
P1.65 milyon samtang ang iyang kaatbang sa gubernatorial race nga si Ace Durano nakagasto og P1.38 milyon.
Laing kandidato nga nisobra sa P1milyon ang nagasto mao si Kongresista Duke Frasco, P1.03 milyon ang
nagasto atol sa iyang pangampaniya. Si Frasco nilansar pagbalik isip kongresista sa 5th district ug siya ang nakadaog.
Atol sa pagsuwat niining balita kagahapon, 30 ka kandidato sa Probinsiya sa Sugbo ang nakasumiter sa
ilang SOCE gikan sa 51 nga nilansar pagka-gobernador, bise gobernador, kongresista ug bokal sa Probinsiya sa Sugbo.
Lakip sa mga nakasumiter og SOCE sila si Vice Governor Hilario ‘Junjun’ Davide III kinsa maoy unang nakaduso niadtong Mayo 23, 2022.
Base sa iyang SOCE, si Davide nigasto og P287,886.08 atol sa iyang pangampaniya sa eleksiyon. — Rowena D. Capistrano ug Le Phyllis F. Antojado/BDB (BANAT NEWS).