Pagpamakuna sa sud sa tunghaan gisugdan na
CEBU, Philippines — Nisikad na ang pagpamakuna dili pa lang dugay sa mga tinun-an sa Dakbayan sa Sugbo batok sa COVID-19 nga gipahigayon sa ilang tagsa-tagsa ka mga tunghaan isip proteksyon sa pagpahigayon sa ilang face-to-face (F2F) classes.
Ang City Health Department (CHD) nagpahigayon og pagpamakuna sa miaging adlaw alang sa mga estudyante, magtutudlo, ug ginikanan sa Hipodromo Elementary School ug High School , Pasil Elementary ug Highschool , ug Tejero Elementary ug High School.
Kining kalihokan sa kagamhanan sa dakbayan gisuportahan sa Department of Education ug USAID.
Sa taho sa Public Information Office (PIO) sa dakbayan, si Jacqueline Taberos, clinic coordinator sa eskwelahan sa Hipodromo ngakanayon nga ang mga estudyante nga wala pa hingpit nga nabakunahan dili makaapil sa F2F classes apan makatungha gihapon kini pinaagi sa modular.
Dugang niya nga sa ilang 1,003 ka mga estudyante, wala pay 50 porsyento ang nabakunahan.
Giawhag ni Taberos ang mga ginikanan nga pabakunahan ang ilang mga anak alang sa proteksyon niini.
Ang usa sa mga ginikanan sa estudyante nga si Genevie Borres nisaysay nga sa dihang nahibaw-an niya ang pagbalik sa pisikal nga klase, nakahukom dayon siya nga pabakunahan ang iyang mga anak.
Ang magtutudlong si Mary Flores Magno nanghinaot nga aduna pay laing schedule sa pagpabakuna sa ilang tunghaan aron mas daghang estudyante ang ma-accommodate sanglit aduna gihapoy mga ginikanan nga wala mohatag sa ilang pagtugot nga mabakunahan ang ilang mga anak. (BANAT NEWS)
- Latest
