Drayber sa traysikol gipusil patay sa kanhi sakop sa PA

CEBU, Philippines — Patay ang usa ka 34-anyos nga lalaki human kini pusila sa usa ka AWOL (absent without office leave) nga sakop sa Philippine Army diha sa Barangay Lindogon, Lungsod Sibonga niadtong Martes sa buntag.

Ang biktima mao si Daido Rufo alyas “Badidot”, tricycle driver ug residente sa maong lugar. Ang suspetsado mao si Jason Pallacios, hingkod ang panuigon, ulitawo, taga Barangay Simala sa maong lungsod ug kanhi sakop sa Philippine Army apan ni AWOL kini sa serbisyo.

Base sa imbestigasyon nila ni Police Major Rodgene Fudotan sa Sibong Police Station sa wala pa mahitabo ang insidente ang biktima diha sulod sa ilang balay naligo kini.

Samtang ang suspetsado kinsa nagsakay sa iyang kolor pula nga motorsilo niabot diha sa lugar ug nangita kini sa biktima.

Ang pag-umangkon ug igsuon sa biktima kinsa diha sa terrace sa balay nag-estambay maoy gipangutana sa suspetsado.

Matud ni Fudotan nga gitawag sa iyang pag-umangkon ang biktima ug gisultihan nga adunay nangita kaniya anaa sa gawas sa ilang balay.

Padulong na sa living room ang pag-umangkon sa biktima dihang nakasulod sa balay ang suspetsado nga nagbitbit og pusil ug sa walay igong rason gipusil niini si Rufo.

Human sa unang pagpamusil nidagan ang pag-umangkon ni Rufo diha sa atubangang pultahan ug ang biktima nidagan usab paingon sa gawas diha sa likod nga pultahan sa balay apan giusban pa kini og pusil sa suspetsado nga maoy hinungdan sa kamatayon niini. Human sa pagpamusil ang suspetsado dali kini nga nisibat ug atol sa hot pursuit operation ang motorsiklo nga gisakyan sa suspetsado maoy naabtan sa mga polis diha sa balay niini ug ang maong sakyanan anaa karon sa kustodiya sa kapolisan. Ang suspetsado padayon pa kining gipangita sa kapolisan. —BDB (BANATNEWS)