Insentibo sa 10 barangay nga Best BADAC  gitunol na

CEBU, Philippines — Nakadawat na sa ilahang incentives ang mga barangay sa Siyudad sa Sugbo nga napili isip ‘Best Barangay Anti-Drug Abuse Council (BADAC)’ sigon pa sa pangulo sa Cebu City Anti-Drug Abuse Council(CADAC) Jonah John Rodriguez.

Napulo ka barangay sa dakbayan ang napili nga Best BADAC nga gilangkuban sa Sudlon 1, Sto. Niño, Sinsin, Sapangdaku, Sudlon II, Parian, Toong, Basak Pardo, Mabini ug Luz.

Gipasidunggan sila niadtong buwan sa Nobiyembre apan una lang nga nakadawat sa ilahang P100,000 nga insentibo ang Barangay Mabini ug Sapangdaku kay dunay may kalangay sa pagproseso niini.

Matud ni Rodriguez miingon nga uban sa Department of Interior and Local Government (DILG) Cebu City ug Philippine National Police(PNP) gi-deliberate gyud nila pag-ayo ang pagpili og Best BADAC.

Usa sa criteria mao ang barangay nga na-drug cleared, dunay active Community Based Drug Rehabilitation Treatment (CBDRT) ug uban pang rekisitos.

Sa napulo ka barangay ang Sinsin nalang ang wala pa makadawat sa ilahang incentive tungoda dunay mga kakulian sa ilahang mga dokumento nga giproseso pa karon.

 “It’s not only the family that will recover, it’s the community as well that will recover, so that’s the importanc of giving focus to this problem”, ni Rodriguez pa.

Sa pikas bahin, ang Barangay Basak sa Mandaue City gipaabot nga ma-drug cleared sa umaabot nga mga adlaw sumala pa ni Konsehal Nerissa Soon-Ruiz, ang focal person sa CADAC sa maong siyudad.

Ang Regional Oversight Committee on Barangay Drug Clearing Program sa Philippine Drug Enforcement Agency (PDEA) 7 maoy kataposang motan-aw kun madeklarar ba o dili drug cleared ang usa ka barangay.

Apan si Soon-Ruiz sigurado nga nga madeklarar ang siyudad nga drug cleared city sayo sa ikatulong quarter niining tuiga

Matud pa ni Soon-Ruiz nga lima pa ka laing mga barangay sa siyudad ang gikatakdang mopahigayon sa deliberasyon sa sunod bulan niining tuiga

Sa nasayran nga walo na ka mga barangay sa siyudad ang gideklarar na nga drug cleared nga naglakip sa Bakilid, Tawason, Casuntingan, Tingub, Casili, Paknaan, Opao ug Tabok. –Romeo T. Limpangog/IBM (BANATNEWS)