Taytayan “overloaded” maong nahugno

CEBU, Philippines — Nagpadayon pa ang imbestigasyon kun unsa gyud ang hinungdan sa pagkahagsa sa karaan nga Clarin Bridge nga miresulta sa kamatayon sa upat ka tawo apil na niini ang usa ka foreign tourist niadtong Miyerkules sa hapon, apan giingong ‘overloaded’ kini base sa unang obserbasyon.

Base sa report sa Provincial Government sa Bohol sigon pa sa initial citing sa Department of Public Works and Highways(DPWH), ang taytayan nibigay gumikan matod pa sa ‘overloading.’

“According to Engr. Magiting Cruz of DPWH, the possible cause of why the bridge collapsed was because the bridge is only for flowing traffic apan ang nahitabo na-stationary ang traffic and there were a lot of vehicles on the bridge and the bridge could not take the weight that’s the reason it collapsed,” matud ni Bohol Govenor Yap sa video message niini.

Base sa uwahing report sa 12 ka sakyanan ang nalunod human ang Clarin Bridge nahugno alas 4 sa hapon niadtong adlaw’ng Miyerkules, Abril 27.

Sa 12 ka sakyanan, unom niini ang four-wheeled cars, usa ka dump truck, tulo ka tricycles ug duha ka motorcycles.

Ang mga rescuers ni-shift na gikan sa search and rescue operation ngadto na sa search retrieval operations alas 8 niadtong Miyerkules sa gabii aron pangitaon ang mga patay’ng lawas.

Si Loay Mayor Hilario Ayuban miingon wala sila nakadawat og report nga dunay missing apan ilahang gisusi tanang sakyanan sa ilawom sa tubig kun duna pa bay tawo.

Sigon sab ni Ayuban nga hospital bills sa mga naluwas abagahon sa lungsod sa Loay pinaagi sab sa pakig-alayon sa Provincial Government sa Bohol.

Ang mga survivors nga wala ra kaayo makaangkon og kadaot gihatagan og P10,000 gikan sa Department of Social Welfare and Development.

Nakig-alayon na sab ang probinsya ngadto sa Austrian Embassy sa Manila labot niadtong foreign tourist nga nakalas sa maong hitabo.

Nasayran nga padayon pa ang pagtrabaho sa bag-ong taytayan tupad sa nahugno nga taytayan nga karaan na kaayo.

Gikatakda unta kining inugurahan sa dili pa matapos ang termino ni Presidente Rodrigo Duterte.

Sa pikas bahin, way angay kabalak-an ang mga motorista nga mag agian sa taytayan sa Mananga ug flyover sa barangay Tabunok, Dakbayan sa Talisay tungod kay lig-on pa kini sumala pa sa Department of Public Works and Highways (DPWH) 2nd engineering district human sa nahitabo sa taytayan sa Loay, Bohol.

Si Engr. Leonardo Abao nibutyag nga nakasiguro siya sa kalig-on sa taytayan ug flyover bisan paman sa kadugayon na niini.  Asoy pa niya nga ang taytayan sa Mananga gipalig-onan na duha ka tuig ang nakalabay.

Samtang ang pagtrabaho sa taytayan mao lang ang pag aspalto human sa piniliay karong Mayo 9. Ang mga tipaka nga nakita sa flyover sa Tabunok naayo nasab apan ang pundasyon niini nagpabilin nga lig-on. —Rowena Capistrano, Gabriel Bonjoc/IBM (BANATNEWS)