CCLEX ablihan ni Duterte karong adlawa

CEBU, Philippines — Pormal na nga buksan karong adlawa ang gikahinaman sa mga Sugbuanon  nga Cebu-Cordova Link Expressway ug tambongan kini sa mga dagkong personalidad sa nasud lakip na ni Presidente Rodrigo Duterte ug Metro Pacific Tollways Corporation (MPTC) Chairman Manuel V. Pangilinan.

Nasayran nga giisip na ang maong imprastruktura kay  usa sa mga bag-ong icon sa Sugbo . Una na nga gianunsyo sa CCLEX  nga ang mga motorsiklo nga dunay engine displacement ubos sa  400cc makaagi na sa  expressway karong  Huyo niining tuiga.

Ang lakang kay suportado sa   resolusyon nga gipasar sa CCLEX Bridge Management Board. Lakip sa ablihan sa maong buwan ang sidewalk alang sa pedestrians ug bikers.

Ang pagbukas sa  8.9 kilometros nga  CCLEX karong adlawa naatol usab sa  komemorasyon sa 501st  Kadaugan sa Mactan  nga nagtimaan sa kadaogan sa mga Pilipino sa pamuno ni Datu Lapulapu batok sa mananakop nga si Ferdinand Magellan sa Espanya.

Ang CCLEX gisugdan pagtukod niadtong tuig 2017 ug Hulyo 5, 2018 uban sa mga seremonyas nga nagtimaan sa pagsugod sa pagtrabaho niini.

Kini ang unang toll road project sa MPTC gawas sa Luzon. Ang CCLEX adunay design speed nga 60 ngadto sa 80 kilometers per hour (kph) ug adunay navigational clearance o gitas-on nga 52 metros aron makaagi ang mga dagkong barko ilawom sa tulay.

Ang CCLEX mogamit og all-electronic toll collection system apan sa Hunyo pa kini magsugod.  Kinahanglang dunay RFID stickers ang mga sakyanan nga moagi sa maong taytayan, apan sa pagkakaron modawat pa sila og cash.

Ang CCLEX adunay 24/7 nga traffic patrol crew nga gi-deputize sa LTO aron mopatuman sa  balaod sa trapiko ingon man usa ka emergency team nga motubag sa mga alarma.

 “We are happy and honored to have come to this point, opening the biggest infrastructure project in this part of the country. We thank President Duterte for honoring us by being part of this historic event,” matud pa ni Metro Pacific Tollways Corporation (MPTC) Chairman Manuel V. Pangilinan.

Bisan pa sa pandemiya ug nalangan ang pagtukod niini wala hunonga ang konstruksyon.

“Today, we mark a different milestone, a modern victory not of arms but of engineering and construction that gave us such a beautiful structure that has now become an icon of Cebu,” dugang pa ni Pangilinan.

Matud pa nga dako kaayo og natampo ang mga Sugbuanong mga eksperto sa pagpadayon sa konstruksyon niini human ang mga langyaw nga consultants wala makaanhi tungod sa mga restriksyon.

Si MPTC President ug CEO Rodrigo Franco mipadayag sa iyang kalipay nga nakompleto na ang taytayan ug makatampo kini sa paglambo sa ekonomiya sa Sugbu.

Si Cebu City Mayor Michael “Mike” Rama nalipay og maayo sa pagbukas na sa maong taytayan tungod kay nagkahulogan kini nga mobalik og kalagsik sa Sugbu. “This means we are back! We are back!” ni Rama pa.

Pinaagi sa CCLEX mas paspas na unya ang pagbiyahe padung ug balik sa Mactan Island. Ang taytayan nagkonektar sa Cebu City ug sa Lungsod sa Cordova.

Gipaabot sab ni Rama nga mobug-at ang traffic sa maong dapit apan matud niya masolusyonan ra kini pinaagi sa maayong pagdumala.

Si kanhi secretary Mark Villar sa Department of Public Works and Highways miingon nga ang CCLEX makaserbisyo og 50,000 ka sakyanan kada adlaw.

“I have no doubt Cebuanos will find their travel even better, easier and they will enjoy being Cebuanos even more,” ni Villar pa.

Si Cordova Mayor Mary Therese Sitoy-Cho nga anak sa usa sa mga nangusog sa katukoran sa CCLEX miingon nga daghan na ang nangutana kaniya nga mga investors nga gustong mobubo og puhonan sa ilang lungsod.— Mitchelle L.Palaubsanon/IBM (BANATNEWS)