Edlab ug women’s group ipadayon sa anak ni Labella

CEBU, Philippines — Gibutyag sa  anak ni kanhi mayor Edgardo Labella nga si Jaypee Labella nga iyang ipadayon ang mga grupo nga giatiman kaniadto sa iyang amahan diin lakip niini ang Edlab Riders ug Cebu City Women’s Federation.

Si Labella kinsa nidagan pagka-konsehal sa Cebu City North District nipadayag nga dili siya makatugot nga maputol ang maong grupo ilabi na nga nagsilbi usab kini nga mga legasiya sa iyang amahan.

Malipayon si Labella gumikan kay gihatagan og bili sa mga miyembro sa maong grupo ang nabuhat sa iyang amahan.

Gibutyag ni Labella nga adunay kapin sa 7,000 ang miyembro sa Edlab Riders samtang kapin usab sa 15,000 ang miyembro sa women’s group.

Matud ni Labella nga nagpadayon ang iyang pagduaw sa mga sakop sa nahisgotang grupo diha sa kabarangayan.

Gawas sa pagbanhaw sa maong mga grupo busy usab siya sa iyang obligasyon isip provincial director sa Ituloy ang Pagbabago Movement (IPM)- Mahalin Natin ang Pilipinas .

Ang maong grupo nagsuporta sa kandidatura ni Inday Sara Duterte sa pagka-bise presidente .

Ug gumikan sa dako nila nga pagsalig kang Duterte ilaha usab nga gi-endoso og apil ang ka-tandem niini nga si kanhi senador Bongbong Marcos kinsa nikandidato pagka-presidente sa nasud.

Sayo pa, si Amor Suniega, chief administrator sa IPM nibutyag nga niabot na sa 7.7 milyones gikan sa nagkalain-laing dapit sa nasud ang nagpa-miyembro sa ilang grupo.

Matud ni Suniega nga magpadayon ang pagtuyok-tuyok sa ilang grupo sa nagkalain-laing lugar sa Pilipinas alang sa pagsabwag sa dakong suporta nila sa Marcos -Duterte tandem. BDB (BANATNEWS)