Cebu City niyukbo kang Raja Humabon

CEBU, Philippines — Nahimong respetado gumikan sa maayong pagtratar ngadto sa iyang mga ginsakopan. Usa kini sa mga hiyas ni Raja Humabon nga nagsilbing sumbanan sa katawhan ilabi na sa nagkadaiyang lider sa komunidad.

Ang maong mensahe maoy gipatigbawbaw kagahapon sa kasaulogan sa Rajah Humabon Day nga dungan usab sa pagtak-op sa 2021 quincentennial commemorations sa Pilipinas. Gipangulohan nila ni Mayor Michael Rama ug Bise Mayor Donaldo Hontiveros ang wreath-laying ceremony diha sa Rajah Humabon marker sa P. Burgos Street. Nalakip sa seremonya ang presentasyon sa ilado na kaayo nga Sandiego Dance Company ug Lumad Basakanon.

Nitambong usab ang mga mananaog sa Miss Cebu 2022 ug ang mga kadagkoan sa National Historical Commission of the Philippines.

Matud ni Rama nga importante kaayo ang pagyukbo sa mga nalambigit sa kasaysayan partikular sa nakahatag og kaayohan sa nasud ug regular ang pagtamod  sa siyudad kang Humabon.

Si Rama nagkanayon nga isip sumpay sa kasaulogan sa Humabon Day magsilbi usab kini nga sekebrasyon sa dakong pagsalig ug pagtuo ngadto kang Señor Santo Niño.

Samtang ang pangulo sa Commission on Historical Affairs Office (CHAO) Bryner Diaz nipadayag nga ang maayong batasan ni Humabon mahimong sumbanan sa katawhan ilabi na sa maayong pagtagad niini ngadto sa mga tawo nga mahimamat niini sa nagkadaiyang level.

Matud ni Diaz nga ang pagabalik lantaw sa kagahapon usa sa maayong butang aron mahimong lab-as kanunay sa huna-huna sa katawhan ang mga positibong butang nga mahimong i-apply sa kasamtangang panahon. —BDB (BANATNEWS)