CEBU, Philippines — Gibutyag ni Atty. Russ Mark Gamallo, director sa Department of Energy Visayas Field Office nga base sa report nga ilang nadawat wala pa gihapon mawala ang mga illegally refilled nga butane canisters bisan og duna sila’y legal canisters nga pwedeng i-refill.
Giingong nisamot og kadaghan karon diha sa mga merkado ang canisters nga bisan legal apan walay silyo timailhan kini nga nga gi-refill sa mga backyard refilling ug dili sa authorized refilling stations.
Matud ni Gamallo nga kun walay silyo ang canister dili ma-check ang kadaghan sa sulod niini dako usab og tsansa nga mao kini ang mahinungdan sa sunog tungod kay dili man ma-check ang quality sa lata, dili mabantayan kon adunay leak ug basin mobuto.
Pipila sa gitan-aw nga hinungdan sa DOE Visayas Field Office nga daghan pa gihapon ang mobuhat niini tungod kay dako kini og kita mat, walay bayranan nga buhis ug ang mga tawo mangita og barato itandi sa canister nga regular nga gi-refill sa planta nga gihatagan og pagtugot.
Gipasabot ni Gamallo nga ang canister bisan og authorize refillable nga cylinder apan walay silyo dili kini gikan sa refilling plants.
Nanawagan ang DOE Visayas Field Office sa katawhan nga dili magpanuko sa pag-report ngadto sa ilahang buhatan kon adunay makit-an o mahibawo nga naghimo og ilegal nga binuhatan tungod kay aksiyonan dayon kini sa nahisgotang ahensiya sa gobiyerno. BDB (BANATNEWS)