CEBU, Philippines — Mokabat sa P100 milyones ang budget sa Cebu City Local School Board (LSB) alang sa pagpaayo sa mga tunghaan sa dakbayan nga naguba human sa bagyong Odette.
Si Karla Henry, tigpamaba ni Mayor Michael Rama, niingon nga ang maong kantidad gituyo alang sa mga materyales ug labor alang sa pag-ayo diin gigamit karon sa LSB alang sa pag-restore sa pipila ka mga tunghaan nga naguba sa bagyo niadtong Disyembre 2021.
Sa pagkakaron mokabat na sa 90 ngadto sa 95 porsyento sa mga tunghaan sa mountain barangays sa Sugbo ang naayo ug duna nay 13 ka tunghaan ang andam na alang sa limited face to face classes karong buwan sa Mayo.
Kini suma pa ni Melissa De La Cruz ang Head sa Local School Board.
Duha ka mga pampublikong tunghaan sa dakbayan ang gitugotan nga makapadayon sa face-to-face nga klase human makakuha og Safety Seal gikan sa Department of Education (DepEd).
Ang duha ka tunghaan mao ang Lahug Night High School ug Mambaling Night High School.
Una nang gipadayag ni DepEd Cebu City Superintendent Dr. Rhea Angtud sa press conference nga sa 127 ka mga tunghaan sa dakbayan ubos sa pagdumala sa DepEd, dili mominus 112 ang nadaot sa bagyong Odette.
Sa 112 ka mga eskwelahan nga naguba, 42 nakakuha og major damages, samtang duha ang totally damaged.
Ang duha nga hingpit nga naguba mao ang mga eskwelahan sa Barangay Pungol Sibugay ug Pamutan.
“The Cebu City Local School Board is also working closely with DepEd which also has about P30 Million Fund for damages which they have specifically used for the severely damaged schools,” segun ni Henry.
Si Rama nisumiter na ngadto sa nasudnong kagamhanan og request alang sa P15 bilyones nga pundo alang sa recovery sa siyudad gikan sa bagyong Odette. MEL (BANATNEWS)