CEBU, Philippines — Human sa 11 ka buwan nga pagpamakuna natapos na ang matud pa misyon sa Project Balik Buhay (PBB) nga mao ang pagtabang sa tanang gipanghimo sa gobiyerno pakigbatok sa COVID19.
Niadtong Marso 30, 2022, ang PBB nakahatag na og kinatibuk-ang 297,593 ka primary ug booster doses ngadto sa mga empleyado ug dependents sa 3,430 ka rehistradong kompanya, organisasyon, micro-establishment ug people’s association gikan sa Metro Cebu local government unit (LGUs).
Sa 346,565 ka rehistradong indibidwal, 136,089 ka indibidwal ang nakadawat sa ilang first dose, ug 134,162 ka indibidwal ang nakadawat sa ilang ikadua nga dose, samtang 27,342 ka booster doses ang nahatag usab pinaagi sa PBB.
Ang PBB Vaccination Center Partners naglakip sa 17 ka private sector gikan sa medical ug non-medical nga mga institusyon nga boluntaryong mitanyag sa ilang mga pasilidad ug uban pang resources atol sa programa, ug kini lakip na ang Chong Hua Hospital – Mandaue, Cebu Doctors’ University Hospital ug Mactan Doctors’ Hospital, Visayas Community Medical Center, Mendero Medical Center, Allegiant Regional Care (ARC) Hospital, University of Cebu Medical Center, SM City Cebu ug SM Seaside City Cebu, Sacred Heart School Ateneo de Cebu, University of San Carlos, the Archdiocese of Cebu, Toyota Talisay ug Toyota Lapu-Lapu, Belmont One, Yuenthai Phils. Inc., ug Oakridge Business Park.
Nitabang usab ang Cebu Velez General Hospital, Perpetual Succour Hospital, UP Medical Alumni Society, LH Foundation, Inc., Emergency Response Unit Foundation (ERUF), Philippine College of Physicians- Central Visayas (PCP-CV) ug Philippine Pediatric Society- Central Visayas. (PPS-CV).
Kapin sa 660 ka mga medical ug non-medical volunteers ang nakatampo og gibana-bana nga 236,000 ka oras nga serbisyo ug 119,352 ka libreng pagkaon ang gihatag sa mga pasyente, doktor, volunteers ug mga staff agig suporta sa nagkalain-laing programa sa PBB sukad sa pagsugod sa pandemya.
Sa kinatibuk-an, kapin sa P300 milyones nga mga donasyon ug kontribusyong cash, in kind o serbisyo ang natampo sa nagkalain-laing partners, donors ug benefactor pinaagi sa PBB programs.
“As we transition into what will hopefully be the endemic phase of COVID-19, Project Balik Buhay is grateful to have contributed in the ongoing mission of saving lives, restoring livelihoods and reviving communities.,” tipik sa statement sa PBB. (BANAT NEWS)