CEBU, Philippines — Gikatakda karong Abril 12, 2022 ang pagpahigayon sa Commission on Election Cebu City og Oplan Baklas sa north ug south district sa siyudad.
Matud ni COMELEC Cebu City South District Election Officer Marilou Paredes nga niadtong Martes nahitabo ang ilahang ikaduhang consultative meeting tali sa campaign committee ug DILG ug gipahibawo nila sa ilahang kalihokan sa nahisgutang petsa.
Si Paredes nagkanayon nga sa pagpahigayon sa Oplan Baklas tantangon nila ang campaign materials nga gipamutang diha sa mga punoan sa kahoy, government buildings, waiting sheds ug poste.
Kabahin sa private area, adunay Temporary Restraining Order kalabot niini ang ilang buhaton mao nga mokuha og picture ug magpadala og notices. Nasayran nga ang COMELEC magpada og notices sa mga kandidato sa umaabot nga piniliay karong May 9, 2022 kalabot sa pagpahigayon nila og Oplan Baklas.
Niadtong Marso 25, 2022 nagsugod ang campaign period sa local candidates nga magpapili sa umaabot nga May 9, 2022 national ug local elections.
Subay niini, gikatakda karong semanaha mopahigayon og Oplan Baklas ang kapolisan sa Dakbayan sa Sugbo kong mohatag na og pagtugot ang Comelec.
Kini ang gibutyag ni Police Lieutenant Colonel Maria Theresa Macatangay, tigpamaba sa Cebu City Police Office.
Matud ni Macatangay nga usa ka simultaneous nga kalihokan ang Oplan Baklas nga pangulohan sa Comelec.
Ang kapolisan mohatag usab og security sa atol sa nahisgutang kalihokan. Rowena D. Capistrano/BDB (BANATNEWS)