CEBU, Philippines — Ang estrikto nga pagpatuman sa waste segregation ug padayon nga education campaign sa paghipos sa basura ang angayan ipadayon sa Cebu City Government.
Kini ang pipila sa sugyot nga gihatag sa mga waste solution providers atol sa gihimong focus group discussion nga gipasiugdahan sa siyudad isip pagpangandam sa Solid Waste Management Summit nga himoon sunod buwan.
Si Emma Ramas sa Bio Nutrient Waste Management, Inc. nagkanayon nga nanghinaot siya nga mahimong kabahin kini sa buhaton ni Mayor Michael Rama human sa summit.
Sa report sa Cebu City Public Information Office, gipadayag niini nga gikinahanglan gyud ang pagpatumam sa ‘no segregation, no collection’ policy".
Kinahanglang hatagan usab sa siyudad og dugang puwersa ang mga barangay alang sa mga nag-unang responsibilidad sa pagdumala sa basura.
Ang Barangay Environmental Officers (BEOs), kinahanglan usab nga aktibong modakop niadtong dili mosunod niini nga polisiya aron masilsil ang disiplina ug batasan sa katawhan.
Ang tighatag sa solusyon sa suliran sa basura maoy usa sa gilauman nga motambong sa Solid Waste Management Summit, nga gikatakda sa Abril 6 hangtud 8.
Si Allan Ogoc sa Calgreens, laing solutions provider, niingon nga mopresentar sila og “high-tech” Materials Recovery Facility (MRF), nga ilang i-invest sa Sugbo.
Ang maong matang sa teknolohiya mahimong usa sa lahi nga kahimanan nga nasuwayan na sa laing nasud. Magbutang usab ang Calgreens og mga kahinguhaan alang sa usa ka kampanyang pang-edukasyon kon unsaon pag-recycle sa husto pinaagi sa social media ug traditional media.
Samtang, si Takeshi Konishi sa Guun Co., Ltd. Philippine branch miingon nga makatabang kini sa siyudad sa pagpalapad ug pag-usab sa kasamtangang planta niini, nga nagtugot sa pagproseso ug pag-convert sa mga basura nga plastik ngadto sa fluff fuel para sa mga planta sa semento.
Lakip sa mitambong sa tigum mao ang Cebu Common Treatment Facility, Inc., RMI Solid Waste Management, ug New Sky Energy Philippines. —MEL (BANATNEWS)