CEBU, Philippines — Gitinguha karon sa kagamhanan sa Dakbayan sa Mandaue nga isubasta sa publiko ang gi- impound nga mga sakyanan nga nahimutang sa Traffic Enforcement Agency (TEAM) impounding area.
Si Konsehal Jimmy Lumapas, chairman sa Committee on Transportation miingon nga ang pagpasubasta sa publiko ilang gikasabotan human sa ilang tigum.
Lakip sa gihisgutan sa tigum ang guidelines alang sa public auction nga gitumong aron maluag ang impounding area nga sa pagkakaron puno na kaayo.
Suma pa ni Edwin Jumao-as officer in charge sa TEAM nga ang mga sakyanan naglakip sa 853 ka motorsiklo, 56 ka kotse, 15; ka tricycle, ug lima ka Six Wheeler truck.
Kasagaran sa gi-impound nakahimo og kalapasan sama sa pagpadagan nga way rehistro ingon man way lisensiya ang driver.
Sa kasamtangan ilang gihimo ang pagsusi sa kondisyon sa maong mga sakyanan pagsuta kun magamit pa kini.
Dugang pa ni Jumao-as niadtong tuig 2021 napulo ra gayod sa gi-impound nga mga sakyanan ang nakuha sa mga tag-iya human nga ilang gibayaran ang storage fee apil na ang penalty niini.
Niadtong miaging tuig gihatagan sa kagamhanan sa Dakbayan sa Mandaue og amnesty ang tag-iya sa gi-impound nga sakyanan subay usab sa giaprobahan nga ordinansa nga gipangamahanan ni Konsehal Lumapas. MEL (BANATNEWS)