Kanhi kargador nakuhaa’g usa ka kilong shabu
CEBU, Philippines — Usa ka kanhi kargador sa Carbon Public Market sa Cebu City nadakpan sa ug nakuhaag shabu nga 1.2 kilo sa buybust operation diha sa Sitio Tubod, Barangay Candulawan, Dakbayan sa Talisay niadtong Miyerkules sa gabii.
Si Police Lt. Elwood Ebona miila sa dinakpan nga si Mark Dexter Fernandez, 31, taga Sitio Bato, Barangay Ermita sa Siyudad sa Sugbo.
Si Fernandez usa ka High Value Individual (HVI) sa kampanya sa kapolisan batok sa ilegal nga drugas.
Matud pa ni Police Lt. Col. Randy Caballes, hepe sa kapulisan sa Talisay taud-taod na nilang gipanid-an si Fernadez.
Ang drugas nga nakuha gikan sa dinakpan giputos og usa ka plastik nga may gibug-aton nga usa ka kilo ug 20 gramos nga mobalor P6,936,000. Si Caballes nitataw nga gikan sa Manila ang drugas nga nakuha sa dinakpan.
Samtang si Police Lt. Col. Mark Gifter Sucalit, Deputy Provincial Director for Operation (DPDO) nibutyag nga subayan nila ang gigikanan sa ilegal nga drugas.
Hinuon iyang gidayeg ang gihimo sa kapulisan sa Talisay sa lain nasab nga kalampusan sa pagpakgang sa ilegal nga drugas.
Drug dens
Siyam ka drug dens ang nabungkag sa mga tinugyanan Philippine Drug Enforcement Agency Central Visyas gikan sa buwan sa Enero ngadto sa Marso karon buwan sa 2022.
Ang tigpamaba sa PDEA-7 Leia Albiar-Alcantara nga nahinabi sa mga tigbalita nga kining mga drug dens duha sa Negros Oriental; usa sa Tagbilaran City Bohol; ug unom sa Metro Cebu.
Sumala pa ni Alcantara, aduna pa silay mga gipanid-an nga mga drug dens sa mga barangay nga naghitak gihapon ang ilegal nga drugas.
Gitug-an ni Alcantara, ang drug dens maoy breeding grounds sa kriminalidadnga makaapektar sa kalinaw sa komunidad.— Rowena D. Capistrano/IBM (BANATNEWS)
- Latest
