CEBU, Philippines — Giawhag sa Konseho sa Siyudad sa Sugbo ang Department of Social Welfare Services (DSWS) nga mag-umol og 24/7 nga Violence Against Women and Children (VAWC) hotlines.
Ang maong hotlines nga dunay landline ug mobile number maoy modawat sa mga reklamo ug report kalabot sa trafficking ug gipangdaog-daog nga kababayen-an ug kabataan.
Kinahanglan usab nga gamiton ang nagkadaiyang social media platforms.
Sila si Konsehal Alvin Dizon ug Konsehal Lea Japson maoy nag-umol sa maong resolusyon nga giaprobahan dayon sa mga sakop sa konseho.
Matud pa sa duha ka konsehal nga gamit kaayo ang maong hotlines sanglit mao usab kini ang maghatag og impormasyon sa mga biktima alang sa mahimo nila nga buhaton.
Nalakip usab sa maong lakang ang pag-umol og koordinasyon sa Association of Barangay Councils (ABC) diin ang mga barangay hall duna gyuy directory sa Department of Social Welfare Services (DSWS)/ Department of Social Welfare and Development (DSWD), Philippine National Police (PNP) Women and Children Protection Center, National Bureau of Investigation (NBI) Violence Against Women and Children Desk, ug uban pa.
Matud pa ni Dizon nga atol sa Marso hangtod Hunyo 2020 nga lockdown, ang PNP nakadokumento og 4,260 ka kaso sa pagpangabuso sa kababayen-an ug kabataan.
Sumala sa Commission on Population and Development (PopCom) ug sa Social Weather Stations (SWS), 1 sa 4 ka Pilipino (25 porsyento) ang nagtuo nga ang maong sitwasyon mao ang labing seryoso nga problema nga giatubang sa mga babaye sa panahon sa pandemya sa COVID-19.
Matod ni Dizon nga gikataho usab nga daghang kaso sa gender violence ang wala nataho tungod sa mga lockdown ug “cultural barriers”. —MEL (BANATNEWS)