Ordinansahon alang sa benepisyo sa day care workers aprobado na
CEBU, Philippines — Ang Department of Social Welfare Services nipadayag sa ilang suporta sa pag-aproba sa ordinansa nga naghatag og benepisyo ug incentives sa mga accredited nga child development workers (day care workers).
Si Konsehal Jessica Resch ang nanginahan sa maong ordinansa.
Ang nahisgutang ordinansa nag-ulohan kini og “Barangay Day Care Workers’ Benefits Ordinance of 2021” diin sayo pa gipaubos kini sa public hearing diha city council.
Si Marivic Alolod, DSWS program head nihangop sa maong lakang gumikan kay ang siyudad karon pa nakabaton og ordinansa nga gitumong alang sa kaayohan sa day care workers.
Matud ni Alolod nga sa pagkakaron ang siyudad adunay 296 ka day care workers diha sa 80 ka barangay.
Ang nahisgutang ordinansa nagtumong sa pag-institutionalize ug pagsiguro sa pagpadayon sa mga benepisyo ug mga insentibo nga madadawat sa Barangay Day Care Workers (BDCW).
Ang matag insentibo o benepisyo nga gikan sa pundo sa kagamhanan sa siyudad kinahanglang susihon ug aprobahan sa DSWS.
Sa higayon nga maaprobahan ang kantidad nga gikinahanglan aron matuman ang mga probisyon sa ordinansa ilakip sa mosunod nga Appropriation Ordinance nga naglangkub sa tinuig o supplemental budget.
Ang DSWS uban sa koordinasyon sa chairman sa Committee on Social Welfare sa Sangguniang Panlungsod ug mga representante gikan sa City Federation of Barangay Day Care Workers maoy mo porma sa Implementing Rules and Regulations sulod sa 60 ka adlaw gikan sa pagka-epektibo sa ordinansa. BDB (BANATNEWS)
- Latest
