Durano ug Davide nakakuha og suporta sa transport groups
CEBU, Philippines — Nakaangkon og suporta karon ang tandem ni kanhi tourism secretary Ace Durano ug Bise Gobernador Hilario Davide III sa ilang kandidatura sa umaabot nga eleksiyon gikan sa pipila ka transport groups.
Sa press statement sa kampo ni Durano ug Davide nagkanayon kini nga 16 ka grupo sa taxi, bus ug jeepney operators ang nisuporta sa ilang kandidatura.
Ang kampo ni Durano nagkanayon nga apil sa nipadangat og suporta nga grupo mao ang Banawa Transport Cooperative, MASADAMOD, National Confederation of Transport Union - Visayas, Pit.os Talamban Transport Union, Lahug Apas Transport Cooperative (LATRANSCO), Mactan Lapu-Lapu Mandaue Transport Cooperative, Compostela Transport Cooperative (COMTRANSCO), Dalaguete Transport Cooperative (DTRANSCO), United Sugbo Transport Coop. And Assoc.of Taxi Operators - Cebu (ATO Cebu), Grab Riders Association of the Philippines (GRABph), United Sugbo Transport Cooperatives (USTC), MAUSWAGON Transport Cooperative, TAMINASCA Transco, BIODMPC, CITRASCO-MPC, ug VUDTRASCO.
Niadtong nilabay’ng Miyerkules nakigtagbosi Durano sa mga representante sa maong transport groups diin iyang nadungog ang mga yangungo ug problema niini.
“Sa niaging tuig, pipila ka mga representante sa transport groups ang nialma human nipakanaog si Gobernador Gwen Garcia og kamandoan nga kinahanglan magsul-ob ang drayber ug konduktor og portable air purifier una sila makabiyahe”, matud sa press statement sa kampo ni Durano.
Ug giingong gumikan sa maong kamanodan daghang drayber ug konduktor ang napugos paghunong og pamasahero samtang ang uban kanila nangutang nalang aron makapalit og dili mohunong ang ilang panginabuhian.
Atol sa tigom, ang grupo nipresentar kini og solusyon sa kasagarang problem sa transport sector apil niini ang pag-institutionalize sa service contracting nga maghatag og regular nga sweldo sa mga drayber ug ang pagtukod og proyekto alang sa mass transit system nga mapahimuslan sa kadaghanan. Si Durano nagkanayon nga ang Probinsiya sa Sugbo isip labing adunahan nga probinsiya lukop Pilipinas ug adunay budget karong tuiga nga P18 bilyones dako ang matabang sa modernisasyon sa mga sakyanan.
“Gamiton ang pundo sa Capitol sa pag-modernize sa mga sakyanan, pinaagi ing-ana, mo-improve man gyud ang serbisyo. Kanang gipanghambog nga datu ang probinsiya, unsaon man nato kong dili moabot sa katawhan isip serbisyo”, matud ni Durano. —BDB (BANATNEWS)
- Latest
