CEBU, Philippines — Mipadayag og kasagmuyo ang 19 ka mga Barangay Health Worker (BHW) sa Dakbayan sa Lapu-Lapu tungod sa matud pa pagtangtang ilang pangalan maong wala na sila makadawat pa og honorarium sa bulan sa Disyembre 2021.
Matud pa sa ilang reklamo nga giuli ngadto kanila ang ilang gisumitir nga daily time record nga mao unta ang pagabasehan sa ilang pagdawat og binulan nga honorarium.
Sa gihimo nilang pakisusi ilang nasayran nga gitangtang na diay sila sa payroll. Apan wala sila masayod kun unsay legal nga basihan kun nganong gitangtang lang silasa ingon ana kasayon.
Si Chona Orimaco, day care worker sa Barangay Basak sa maong dakbayan miingon dugay na sila nga nagserbisyo isip mga BHW sa siyudad sa Lapulapu.
Matud pang Orimaco ang kadaghanan kanila ang nagserbisyo sulod sa daghan nang katuigan, dunay 30 ka tuig na nagserbisyo ug accredited usab sila nga health workers sa Department of Social Health Worker sa Region 7. Ang honorarium sa BHWs mag-agad sa gidugayon nila sa serbisyo.
Adunay magdawat og P5,000 matag bulan, adunay P4,500 ugu P4,000 ug ang labing ubos mao ang P2,000 ang matag bulan.— IBM (BANATNEWS)