CEBU, Philippines — Gipaabot nga malangan gihapon ang implementasyon sa Bus Rapid Transit (BRT) project.
Mao kini ang napanglantawan ni Cebu City South District Councilor James Cuenco kinsa nibutyag nga wala madayon ang gikatakda nga tigom nila sa mga nagdumala sa maong proyekto gumikan kay naabtan kini sa Bagyong Odette.
Nagmalaumon si Cuenco nga madayon na ang maong tigom sulod karong buwana gumikan kay gusto unta siya masayod kun unsa na ang kalamboan sa maong proyekto.
Nagkanayon ang konsehal nga sa sitwasyon karon sa siyudad, importante na unta kaayo ang BRT tungod sa kakulang gihapon sa mga pampublikong sakyanan.
Kahinumdoman nga nanawagan si Cuenco kaniadto sa Department of Transportation (DOTr) nga unta moklaro sa tinud-anay nga istado sa proyekto.
Una niini si Cuenco nagduda kaniadto nga hanap gyud ang posibilidad nga matuman sa DOtr ang saad niini nga mahuman na ang first phase niadtong Disyembre 2021.
Duna'y request kaniadto kalabot sa pagahimoon nga mga negosasyon sa land owners ug matud pa ni Cuenco nasugdan na kini.
Sa nangaging report base sa labing ulahi nga tigom ni Cuenco ug sa mga reprsentante sa DOTr sa miaging tuig , duna matud pay trabahoon ang DOTr nga ubang proseso niini ngadto sa ubang ahensya sa gobyerno nga sama sa National Economic and Development Authority (NEDA) ug Department of Budget and Management (DBM).— MEL (BANATNEWS)