Mga establisamento gitinguhang adunay standby power supply

CEBU, Philippines — Niduso og ordinansahon si Konsehal James Cuenco nga magmando sa mga establisamento nga nagtanyag og basic services nga kinahanglanng aduna sila’y standby power supply o pagmentinar sa labing menos 50 porsyento nga gasolina, tubig, pagkaon, tambal, ug cash supply kada semana.

Ang maong ordinansahon nag-ulohan og “Resiliency and Efficiency Amidst Disaster and Emergency Ordinance o READE Ordinance” ug kasamtangan kining gitun-an.

Matud ni Cuenco nga ang bagyong Odette usa ka wakeup call sa tanan ilabi na sa mga Sugboanon nga kinahanglang  kanunay gyud kini nga andam sa panahon sa kalamidad ug emerhensiya.

Tumong sa maong ordinansahon nga maandam ang katawhan sa bisan unsang emerhensiya, mamenosan ang dili maayong epekto niini ilabi na ang kakuwang sa suplay sa mga tubig, palaliton, kwarta ug mga signal sa komunikasyon ug uban pa.

Ang edipisyo kinahanglang adunay gamit nga standby power supply nga makasuplay sa boltahe nga kinahanglanon sa ilang negosyo sulod sa minimum nga walo ka oras nga operasyon.

Ang boltahe nga gikinahanglan tinuon kini diha sa ilang aplikasyon alang sa ilang compliance certificate nga gikan sa building official.

Ug kon maaprobahan ang maong ordinansahon mahimo na kini nga usa sa mga rekisitos sa pagkuha og business permit.

Ang OBO mohimo usab og random inspections alang sa mga patigayon atol sa oras niini sa ilang operasyon.

Usa sa unod sa maong ordinansahon nga kon adunay masakpan nga wala magsunod sa lagda mopadala ang OBO og report ngadto sa Business Processing and Licensing Office ug irekomendar ang pagpasira niini. BDB (BANATNEWS)