CEBU, Philippines — Nanawagan si Partido Pilipino sa Pagbabago-Bakud gubernatorial candidate Ace Durano sa tanang Sugboanon nga karong dunay pandemiya ug katalagman mas labing maayo ang pagtinabangay alang sa paspas nga pagbangon.
Matud niya, nahimuot ug naenganyo siya sa mga nadunggang estorya bahin sa pagka-maagwantahon sa mga Sugbuanon atol sa gihimo nilang relief operations sa mga lugar nga naapektahan sa bagyong Odette. Tungod niini mas gusto nilang daghan pa ang matabangan karong mosunod nga mga adlaw.
“Grabe nga kalisud ang gi-agian sa atong mga kaigsuonan. Ang uban nila, wala na’y tarong pinuy-anan, maglisud pa gani pangita ug tubig mainum, pero dako gyapon kaayo ilang ngisi, kusug gyapon ilang katawa sa among mga relief operations,” matud ni Durano kansang partido nakatunol na og P1,820,000 sa ilang relief operations.
Apil sa mga nahatdan og bugas ug cash assistance sa partido ni Durano ang mga taga Danao, Compostela, Liloan, Cordova, Mandaue, Talisay City, Minglanilla, Naga, Sibonga ug Argao.
“Kabalo ko nga gamay ra kaayo ni siya pero ug mangayo ra ko daan dispensa sa atong mga kaigsuonan nga dili ta makahatag ug dako, pero atong hinabang kinasingkasing ug kani, pina-agi ani, nanghinaut ta nga matabangan sad nato ang gobyerno. Karong panahona, tinabangay tang tanan,” said Durano.
Niadtong Enero 4, si Durano nakigkita sa mga partners niini sa mga kalungsoran aron mahatag ang tag P100 mil nga financial assistance sa kada LGU sama sa Argao, Asturias, Alcantara, Alegria, Badian, Barili, Consolacion, Cordova, Oslob, Pinamungajan, San Fernando, Sibonga ug Toledo. Midonar sab si Durano og 12 ka generator sets sa mga lugar nga wala pa nabalik ang kuryente.—IBM (BANATNEWS)