CEBU, Philippines — Si Cebu City Fire Marshal Chief Inspector Josephus Alburo nagkanayon nga sukad sa iyahang paglingkod gisugdan sa pagpatuman ang pagpasaka og kaso batok sa tag-iya sa edpisyo nga gigikanan sa mahitabong sunog.
Matud ni Alburo nga sukad sa niaging tuig hangtud karon 12 ka tawo ang gipasakaan nila og kaso ug upat niini ang nakonbikto.
Gipasabot ni Alburo nga gihimo nila kini aron dili mausik ang disaster funds sa Local Government Unit sa Cebu City tungod kay magsige og hatag og ayuda sa mga tawo apan adunay uban nga iresponsable kaayo ug dili kabibawo mag-amping sa ilang panimalay ug gamit.
“Dako kaayo pirmi ang disaster funds nga magawas tungod lang nianing mga negligence lang siya. Mag-atubang sila og kaso in fact naa nami na file 12 ka kaso and naa nay upat nga nakonbikto sa maong binuhatan. Gisugdan nato ni pagsugod sa pagka hepe nako”, matud ni Alburo.
Si Alburo nipahinumdom sa katawhan aron malikayan ang sunog bantayan kanunay ang mga substandard nga electrical wirings, ang mga gipanglung-ag o giluto bantayan, magmatngon usab sa mga bata nga magduwa og posporo ug uban pa nga posibleng mahinungdan sa sunog.
Giawhag usab niini ang katawhan nga dili mogamit niining illegal refilled LPG tungod kay dili man haom ang canister alang niini ug daghan nang sunog ang nahitabo diin mao kini ang hinungdan.
“We have a lot of cases nga mao na ang cause and atong pahinumduman karon ang mga molupyo sa Cebu City nga ang Cebu City Fire Office mokiha gyud mi sa kinsa ang nagsugod sa sunog whether an accident or intentional”, pahimangno ni Alburo.
Nunot niini, gipangandaman usab karon sa kabomberohan ang mga kalihokan niining panahon sa pasko. Kagahapon gilusad ang nationwide “Oplan Iwas Paputok” diin nagkadaiyang programa ang himuon.
Kini saama sa rekorida nga magpahimangno sa mga tawo sa mga angayan ug dili angayang buhaton kun ugaling dili malikayan nga mogamit og pabuto.
Nakig-alayon ang BFP sa LGU alang sa programa paglikay sa disgrasya mugna sa mga pabuto. —BDB (BANATNEWS)