Lapu-Lapu Expressway ugmaron ubos sa PPP

CEBU, Philippines — Gitambongan sa mga opisyal sa kagamhanan ug mga magpapatigayon sa Dakbayan sa Lapu-Lapu ang gipahigayon nga public hearing alang sa pagaugmaron nga Lapu-Lapu Expressway nga mosumpay sa third bridge sa Lungsod sa Cordova nga motadlas paingon sa Mactan Cebu International Airport (MCIA) sa Siyudad sa Lapu- Lapu.

Lakip sa nitambong sa maong public hearing si Mayor Junard Ahong Chan ug  Bise Mayor Celedonio Sitoy kauban sa mga sakop sa konseho sa maong dakbayan.

Si Chan nagkanayon mokabat ngadto sa P24.41 bilyones ang nahisgutang proyekto nga pagaugmaron pinaagi sa Public Private Partnership (PPP) ug abagahon sa pribadong contractor ang kaugmaran niini.

Matud ni Chan nga makahatag og dugang kalamboan sa siyudad ang kaugmaran sa expressway nga walay gasto ang siyudad.

Dugang ni Chan nga ang maong proyekto makatabang sa paspas nga pagbiyahe  ug dugang pang income ang masulod sa panudlanan alang sa dugang serbisyo ug mga proyekto nga maangkon sa mga Oponganon. —BDB (BANATNEWS)