Pagpalupad og drone idili sa mga lugar sa Talisay

CEBU, Philippines — Idili na unya ang pagpalupad og drone diha sa pipila ka lugar sa Dakbayan sa Talisay. Kini base sa giduso nga ordinansahon ni Konsehal Gail Restauro diha sa konseho sa siyudad.

Matud ni Restauro nga si Senior Inspectpr Crysirel Awe, warden sa Talisay City Jail maoy naghangyo niini gumikan kay mahimo man kining magamit sa ilegal nga kalihokan.

Ang drone adunay kaayohan nga ihatag kong kini gamiton sa maayo nga paagi apan dako usab kini og hulga sa siguridad kong gamiton sa ilegal.

Subay niini, si Awe nagkanayon nga wala paman kini nahitabo sa Talisay ang paggamit sa drone nga ilegal apan nahitabo na kini sa ubang lugar.

Si Restauro sa iyang bahin, nagkanayon nga iyang gilakip sa ordinansahon ang pagdili sa pagpalupad og drone diha sa Talisay City Jail, police station, city hall, barangay hall ug mga eskwelahan  sulod sa 100 meter radius.

Si Police Lieutenant Colonel Randy Caballes, hepe sa kapolisan sa siyudad nagkanayon nga gilantaw nila ang siguridad alang sa katawhan.

Matud usab ni Restauro nga aduna silay gihan-ay nga mga silot sa mga makalapas. Samtang naa usab silay mga rekisitos nga gihan-ay o mga permit aron sa paghimo nga legal ang pagpalupad sa drone. BDB (BANATNEWS)