Scholarship grant ni Frasco gisugdan na
CEBU, Philippines — Dul-an usa ka libong mga tinun-an gikan sa kalungsoran ubos sa Kinto Distrito ang nahatagan og scholarship grants. Madugang kini sa dul-an 10 mil na ka mga tinun-ang iskolar sa distrito.
Si Kong. Duke Frasco nangapod-apod na sa iyang #TeamFrasco Scholarship Grants alang sa School Year 2021-2022 sa mga kwalipikadong scholars sa distrito isip katumanan sa saad sa paghatag og prayoridad sa edukasyon pinaagi sa lapad nga scholarship program sa tibuok distrito.
Dul-an sa 1,000 ka tinun-an sa Lungsod sa Borbon ug Sogod ang bag-o lang nakadawat sa scholarship grants nga kantidad og P3,000 ngadto sa P5,000 matag tinun-an alan sa matag semester diin mokabat sa P3.1 milyones alang sa duha ka lungsod. Karong semanaha ipadayon ang pagpanghatag sa maong scholarship grants sa ubang lungsod sa Kinto Distrito.
Ang lapad nga scholarship program labing una kin isa kasaysayan sa Kinto Distrito nga gilusad sa unang lima ka buwan ni Frasco isip kongresista.
Malaumon si Frasco nga madugangan pa kini karong tuiga tungod sa iyang tinguha nga mapaabot ang gasa sa edukasyon sa matag pamilya.
Sa Lungsod sa Liloan, gihiusa ni Frasco ug sa iyang asawa, Mayor Christina Garcia Frasco, ang ilang kahinguhaan alang sa #TeamFrasco Liloan Scholarship Program diin ang mga Liloan scholars kausa lang moduso sa ilang application forms sa buhatan sa kongresista sa munisipyo sa lungsod.
Kuyog ni Kong. Frasco sa pagpanghatag sa scholarship grants sila si Provincial Board Member Red Duterte ug Mike Villamor, Mayor Noel Dotillos ug Bise Mayor Roy Melgo sa Borbon, Mayor Richard Streegan ug Bise Mayor Moonyeen Durano-Streegan sa Sogod, ilang mga konsehal ug ubang mga opisyal sa lungsod ug barangay. IBM (BANAT NEWS)
- Latest
