CEBU, Philippines — Gipangandaman sa kagamhanan sa Dakbayan sa Sugbo ug sa Simbahan ang pagtugot sa pagpahigayon sa Misa De Gallo gawas sa mga simbahan.
Atol sa tigum kagahapon uban sa Archdiocese of Cebu ilang nahisgutan ang paghatag og pagtugot sa misa nonot sa kasaulogan sa pasko.
Kahinumduman nga sa miaging tuig wala’y gitugutan nga makapahigayon og misa gawas sa simbahan.
Apan karon sigon ni Cebu City Councilor Joel Garganera pangulo sa Emergency Operations Center Cebu City nga gitugutan na nila ang pagpahigayon og misa gawas sa simbahan apan sa mga lugar lang nga naghimo na og misa sa wala pa ang pandemya.
“So It’s already established that they’ve been celebrating masses there, it could be an auditorium, it could be a big chapel, it could be an open area”, ni Garganera pa.
Giklaro ni Garganera, sa mga nagplano nga mopahigayon og misa alang lang sa maong katuyuan kinahanglan nila mangayo og clearance sa Barangay ug ilang ipadangat sa EOC.
“The purpose of which is coordination so in each Barangay they will know how many area are celebrating dawn mass so that we can also coordinate just in case”, ni Garganera pa.
Nasuta nga 50 percent ang capacity sulod sa simbahan ug giawhag nga mga fully vaccinated lang ang makasulod ug gi-discourage ang presensiya sa mga menor de edad.
Dugang ni Konsehal Garganera tugutan ra nila ang mga maninda og mga pagkaon o kaha painit palibot sa simbahan kini aron paghatag og kahigayunan sa katawhan nga makapanginabuhi basta dili lang gyud makamugna og panagtapok. Padayon nga nag-awhag ang EOC sa mga tawo nga dili gyud mokompyansa aron dili mapareha sa ubang mga nasod nga subling nakasinati og pagsaka sa kaso sa COVID-19. —MEL (BANATNEWS)