CEBU, Philippines — Patay ang usa 73-anyos nga lalaki human kini giingong nalumos samtang mano-mano nga namukot sa kadagatan diha sa Barangay Guiwanon, Lungsod sa Argao niadtong Biyernes sa hapon.
Ang namatay mao si Flavio Ephan Orbeta, residente sa Barangay Tonggo Balandia, Guiwanon sa maong lungsod.
Matud pa namukot si Orbeta diha sa dapit dihang kataposang nakit-an sa laing mananagat nga nangisda sa lugar.
Sa wala pa kini mahitabo, nakita si Orbeta nga nagkapa-kapa sa tubig apan ang mananagat nga nakakita wala manumbaling kay nagtuo ra kini nga nangabog sa mga isda aron modasmag sa pukot niini.
Apan nahibulong kini kay wala naman mobalik og tunga human mitidlom paglabay og pila ka minutos. Tungod niini giduol kini sa maong mananagat ug nakita nga nawad-an kini og panimuot.
Dali niya kining gibira padung sa baybayon ug nangayo og tabang sa lungsod. Sa pagabot sa mga rescuers gidala kini dayon sa Isidro Kintanar Memorial Hospital apan gideklarar nga dead on arrival.
Buot untang ipaubos sa kapulisan sa autopsy ang lawas apan ang pamilya nagtuo nga walay foul play ang kamatayon niini.— IBM (BANATNEWS)