CEBU, Philippines — Gihangop sa mga deboto sa mahal nga Birhen sa Regla ang pagtugot kanila nga makabisita sa milagrosong imahen sa Nuestra Señora De Regla-Parish National Shrine panahon sa pagsaulog sa fiesta sa Nobyimbre 19 ug 20, 2021.
Lakip sa nahinangop mao ang pipila ka deboto nga Mandauehanon nga miingon nga kasagaran kanila ang pagbaklay agi sa Mactan Mandaue Bridge paingon sa iyang simbahan nga nahimutang sa Barangay Poblacion sa Dakbayan sa Lapu-Lapu.
Si Marieta Saladaga, 67 anyos nga kanhi domistic helper sa Taiwan nga taga Barangay Pagsabungan sa Dakbayan sa Mandaue miingon nga deboto na gayod siya sa mahal nga Birhen sa Regla sukad sa nagtungha pa siya sa high school.
Dugang pa niya dihang nagtrabaho na siya sa Taiwan mouli gyud siya sa Nobiyembre kay Kalag-Kalag ug motambong usab og mga misa nobena sa piyesta sa Mahal nga Birhen sa Regla.
Hinuon giklaro ni Father Reynante Joseph Ga, parish priest sa National Shrine sa Birhen sa Regla nga gidili ang paghalok sa imahen nga maoy naandan nga himoon sa mga deboto aron paglikay sa pagkatap sa COVID-19.
Dugang pa niini nga sa Sabado, Nobiyembre 6, 2021 adunay pasiugdahan nga motorkada sa imahen sa Birhen nga maoy hulip sa Walk with Mary Solemn procession.
Himoon ang grand motorcade sa petsa 19, nga pasiugdahan sa simbahan nga mao usab ang hulip sa tinuig nga fluvial procession. —MEL (BANATNEWS)