Menteryo sa Calamba wa pasudli, daghan ang nadismaya

CEBU, Philippines — Daghan ang nadismaya tungod kay wa pasudla sa menteryo sa Calamba kagahapon Nobiyembre 3, 2021.

Base sa advisory sa San Nicolas Parish tagdumala sa menteryo nga wa pasudli ang menteryo kagahapon tungod kay nanghinlo pa sila sa mga wiring sa koryente, apan buksan na kini karong adlawa.

Apan daghan ang nadismaya tungod kay sa ilang nasayran ablihan na ang mga menteryo sa Nobyembre 3 ug nausik ang ilang panahon ug wala makahimo sa ilang tumong sama ni Helen Tilawan nga taga Barangay Babag 2 nga migasto gyud og pagpatubil ug nag-abang og sakyanan apan wa makasulod sa menteryo.

Suma ni Leslie Mitante ang Parish Secretary nga ang pagsira sa sam-ang sulod sa unom ka oras gihimo tungod kay nanghipos sa mga suga ug aron wala’y makuryentihan.

Sa laing bahin pabilin nga bantayan sa kapolisan ang mga sam-ang sa Dakbayan sa Talisay hangtud sa adlaw nga Biyernes.

Si Police Lt. Col. Gerard Ace Pelare, pangu sa kapulisan nitataw nga magpabilin ang ilang presensya lakip na ang force multiplier, barangay tanod, mga sakop sa City Disaster Risk Reduction and Management Office (CDRRMO) ug City of Talisay-Traffic Operation Development Authority (CT-TODA) aron pabilin nga malinawon.

Suma ni Pelare nga malinawon ang pag obserbar sa adlaw sa mga Kalag ug Santos sa Dakbayan ug nanghinaut siya nga magpadayon kini.

Samtang namatikdan nga nagmingaw ang mga sam-ang sa Dakbayan sa Sugbo, human kini gibuksan Miyerkules sa buntag.

Giklaro ni Police Lieutenant Colonel Wilbert Parilla, Deputy Director for Operations nga limitado lang gihapon ang makasulod sa mga sam-ang ug kauban sa kapolisan sa pagpatuman sa kahapsay ug kalinaw mao ang taskforce kasaligan ug mga force multipliers. —Gabriel C. Bonjoc, Rowena D. Capistrano/MEL (BANATNEWS)