Mga bukog sa patay gipangsulod og sako

CEBU, Philippines — Mga bukog sa patay namatikdan nga gipangsulod og sako ug gitapok diha sa St. Joseph Cabantan Cemetery sa Bo. Luz.

Gipasabot ni Bo. Luz Councilor Tito Durano, maoy caretaker sa maong sam-ang nga kun maabot na og five years ang minatay nga gilubong, habwaon gyud ang bukog niini naay tagtungod o wala.

Apan iyang giklaro nga kompleto kini sa record aron kun mangita ang tagtungod niini dali ra makit-an.

“Ini’g habwa nato ato sad ning ampingan dili sad nato binuangan o bisan asa ibutang kay sagrado sad baya kaayo na, grabe sad na ka kuan bisan ingon ana sila tradition pa natong kuan makagaba sad na sila sad, dili na kabinuangan nimo, bisan ingon naa na sila dili gihapon ta kayama-yama ana. Naa na sila diha karon gibutang unya diha sa nato for the meantime gibutang kay ang uban inig pangita dali ra pagkuha, gisulod og sako, numbering, tanang detalye sa lapida ato na gi-record,” ni Durano pa. Moabot sa 150 ka bukog sa nagkalain-laing tawo ang ilang gihipos ug kun dili gyud ma-claim sa tagtungod magbutang sila og dakong lubnganan alang nila ug ipahimutang og tarong.

 “Naa man na siya sa kontrata nga mo five years na gani ang tawo sa cure niya habwaon na siya unya og dili pa gyud siya mahitabo nga naa man gyuy tawo nga wala pa totally ma bukog ibalik nato na mao na ma extend nato sila og 1 and a half year bayad sila og P800,” asoy ni Durano.

Diha sa Cabantan Cemetery ang pagpalubong nagkantidad og P2, 000 ug P4, 000, diin ang  P2, 000 mao kining nitso para sa mga gagmay’ng lungon samtang duna say tag P4, 000 para sa mga dagkong nitso, apil na sab niini ang labor, pagtaod ug pagtabon.

Duna say bone chamber ang maong sam-ang, P7, 000 ang bayad niini alang niadtong mga tagtungod nga gusto adto ibutang ang bukog sa minahal nila sa kinabuhi nga gihabwa, ug ang kontrata niini moabot og 25 ka tuig. MEL (BANATNEWS)