Yuta sa barangay sa Compostela nangliki; Karsada sa Manipis dili pa maagian

CEBU, Philippines — Gisusi sa mga personnel sa Mines and Geosciences Bureau ang usa ka barangay sa Lungsod sa Compostela ang gikatahong pagpangliki sa yuta

sa maong lugar. Ang nahisgutang lugar diin nangliki ang yuta mao ang Sitio Ka- Edil, Barangay Tag-Ube.

Gikatahong walo ngadto sa siyam ka indibidwal kinsa naapektohan ang namakwit.

Nasayran nga niadtong Oktubre 4, 2021 nagsugod og pangliki ang yuta sa lugar gumikan sa sunod-sunod nga uwan ug ang nahisgutang dapit aduna kini duha ka panimalay nga nahimutang ug gi-cordon na karon.

Base sa report sa information office sa MGB-7 nga duha ka geologist ang nisusi sa area niadtong Oktubre 13, 2021 ug gipaabot nga karong adlawa nga makahimo na og assessment ang MGB-7 kalabot sa maong hitabo.

Sa laing bahin, posibleng molanat pa og taas nga panahon nga maagian pagbalik sa mga motorista ang dalan diha sa Sitio Languyon, Barangay Manipis, Dakbayan sa Talisay.

Si Jonathan Tumulak, hepe sa City of Talisay-Traffic Operations and Division Authority nagkanayon nga lisod pa kaayo ang sitwasyon sa kabukiran tungod kay inig hawan sa mga bato ug yuta nga nitabon diha sa karsada mao naman usab kini ang modahili.

Matud ni Tumulak nga peligro kini sa mga motorista hinungdan nga ang iyang sakop padayon nga gipabantay diha sa ubos nga bahin aron mao na ang mopahibawo sa motorista nga mangita nalang og laing kaagi-an.

Ang maong karsada lahos kini ngadto sa Dakbayan sa Toledo ug bukirang barangay sa Syudad sa Sugbo.

Ang pagdahili sa yuta nagsugod sa dihang nagsunod-sunod ang pag-uwan.

Si Tumulak nirekomendar sa mga molupyo sa nahisgutang dapit nga mohangyo sa ilang mga gitrabahoan nga usbon ang ilang schedule sa mpagtrabaho gumikan kay apektado sila sa maong sitwasyon.

Sayo pa, ang Provincial Environment and Natural Rasources nisugyot nga maghimo nalang og laing karsada.

Nunot niini, si Mayor Gerald Anthony “Samsam”Gullas Jr. mohangyo ngadto sa Department of Public Works and Highways-7 sa ilang mahimo sa maong problema diha sa lugar. — Gabriel C. Bonjoc, Rowena D. Capistrano (BANAT NEWS)