Garganera nipahimangno sa mga magmotorkada

CEBU, Philippines — Si Konsehal Joel Garganera, hepe sa Emergency Operations Center Cebu City adunay pahimangno sa mga nikandidato sa lokal ug national nga eleksiyon sa sunod tuig.

Matud ni Garganera nga adunay duha ka national candidates ang mopahigayon og motorkada sa adlaw’ng Sabado ug Domingo ug giingong moabot sa 80 ngadto sa 100 ka sakyanan ang moapil niini.

Gipasabot ni Garganera nga dili lang basic health protocols ang gitan-aw nila lakip na ang dagan sa trapiko.

“Reminder lang pod nako sa mga organizers nga og gusto ta wala’y negative nga mga reaction ang mga citizens ilabi na ang naa sa dalan dili buot gusto nga kita na nuon ang maka-create og traffic, dili ta gusto ingon ana mahitabo”, ni Garganera pa.

Nunot niini, nakig-alayon ang EOC sa Cebu City Transportation Office ug Traffic Unit sa Cebu City Police Office ingon man sa ubang Local Government Units aron mahisgotan nga limitahan lang ang mga sakyanan nga magdagan diha sa kadalanan.

Si Garganera nagkanayon nga sa mga sakyanan nga tugotan nga makaapil sa motorkada ang Cebu City Police Office ug Cebu City Traffic Operations ang mo-assess niini ug apil sa tan-awon ang oras, adlaw ug rota sa kalihokan.

“Kong maghisgot gani ta og caravan nga mo-cover og areas like magsugod sila sa Consolacion mo traverse sila sa Talisay o laing area unya moagi diri sa Dakbayan sa Sugbo they are only limited to national road, as much as possible dili sila magtuyok-tuyok kay atong gilikayan ang traffic”, dugang ni Garganera. (BANAT NEWS)