CEBU, Philippines — Gikatakdang 12 ka tunghaan sa Probinsiya sa Sugbo ang apil sa pilot schools sa pagpatuman sa face to face classes sa Department of Education.
Atol sa virtual press briefing kagahapon, si DepEd Undersecretary Nepomuceno Malaluan nianunsiyo nga 59 ka eskwelahan lukop nasud ang qualified nga mopahigayon og physical classes.
Ang DepEd nag-target og 120 ka tunghaan nga makapahigayon og face to face classes.
Ang physical classes sa pilot schools magsugod karong Nobiyembre 15, 2021 ngadto Enero 31, 2022.
Sa Central Visayas, ang tanang mga naapil sa pilot schools naggikan sa Probinsiya sa Sugbo diin lima niini sa Bogo City nga gilangkuban sa Combado Elementary School, Siocon Elementary School, Odlot National High School, Don Potenciano Catarata National High School ug Bartolome Pianar National High School.
Ang ubang tunghaan naglakip sa Busay National High School (Moalboal); Basak Elementary School (Samboan); Mahanlud Elementary School (Malabuyoc); Cabagdalan Elementary School (Balamban); Luyongbaybay Elementary School (Bantayan); Cañang-Marcelo Luna National High School (Oslob); ug Pilar National High School (Pilar, Camotes Island).
Si Dr. Marilyn Andales, School Division Superintendent sa Probinsiya sa Sugbo nagkanayon nga upat ka eskwelahan nga naapil sa listahan sa pilot schools sa Cebu Province division ang ilaha unang i-revisit tungod kay kulang pa kini og requirements.
Ang maong mga eskwelahan mao ang anaa sa Oslob, Balamban ug Malabuyoc.
Ang DepEd-7 una kining ni-endorso og 52 ka pampublikong tunghaan sa Central Visayas aron makapahigayon na og face to face classes.
Niadtong tuig 2020 sa pagsugod sa pandemiya gihunong sa DepEd ang pagpahigayon sa physical classes tungod sa hulga sa virus. —BDB (BANATNEWS)