Call Center Agent mokandidato pagka-mayor

CEBU, Philippines — Niduso kagahapon sa iyang certificate of candidacy (COC) pagka-mayor sa Siyudad sa Sugbo ang 30 anyos nga si Edgar “King Solomon”  Viola -Concha Jr. nga residente sa Sitio Guadalajara , Barangay Guadalupe.

Suma pa ni Concha  nga sa Cotabato City  siya natawo , ug  10 ka tuig na siya nga nagpuyo dinhi sa siyudad. Nagtrabaho siya sa usa ka Business process outsourcing (BPO) company.

Pangangkon pa ni Concha nag-ugat ang iyang pamilya sa San Miguel, Bulacan ug kadugo niya ang best friend ni Dr. Jose Rizal nga si Dr. Máximo Viola kinsa usa usab ka propagandist sa panahon  sa mga bayani nga sila si Emilio Aguinaldo , Andres Bonifacio ug Heneral  Antonio Luna.

Nakahukom siya modagan pagka-mayor isip independente1 kay ganahan siya makatabang sa mga tawo ilabi na sa kababaenhan , persons with disabilities (PWDs) , katiguwangan ug uban.

Hingusgan usab niya ang kampanya batok sa ginadiling drugas ug tutokan ang mga programa  alang sa maayong panglawas.

Sa laing bahin ang kanhi Department of Interior and Local Government (DILG) Undersecretary ug kanhi Cebu City administrator Francisco “Bimbo” Fernandez niduso usab sa iyang COC pagka-bise mayor sa siyudad sa Sugbo ubos sa Liberal Party.

Gikonsiderar niya ang iyang kaugalingon nga independente dinhi sa siyudad sanglit wala man siyay partidong gikuyogan apan hugot niyang gi endorsar si Bise Presidente Leni Robredo alang sa pagka presidente sa sunod nga piniliay.

Margot O.

Kahinumdoman nga mayor unta ang iyang daganan apan nausab kini ngadto sa pagka -bise mayor human siya nakadawat og impormasyon nga modagan pagka-mayor si kanhi Konsehal Margarita Osmeña nga asawa sa iyang gialagaran kaniadto nga si kanhi Mayor Tomas Osmeña.

Matud pa ni Fernandez nga karong Huwebes moduso si Margot  og COC alang sa pagka mayor. Suod niyang higala ang mga Osmeña sulod na 40 ka tuig.

Kung ang Cebu City daghan na ang kasikas sa mga niduso og COCs, gilangaw sab ang buhatan sa Comelec Cebu Province sa ika-upat ka adlaw sa filing certificate of candidacy (COC) kagahapong adlawa.

Wala pay niduso og sertipiko ilabi na sa pagka gobernadora, bise gobernadora apan duna nay nakaduso og COC niadtong unang adlaw sa filing ug niadtong adlaw nga Domingo sa pagka board member ug kongresista.  Apan gituohan nga sugod karong adlawa hangtud sa Oktubre 8 magkadaghan na kini.

Niadtong Domingo niduso og COC pagka board members ilang Frederico Garcia isip independente sa 6th district ug si Emmanuel Birao tersero distrito sa lalawigan ubos sa Abag Promdi. –Le Phyllis F. Antojado/IBM (BANATNEWS)