Dul-an 60 ka paresan nakapahimus sa mass wedding
CEBU, Philippines — Nakapaso gyud paingon sa altar sa kaminyoon ang dul-an sa 60 ka paresan sa bag-ohay lang nga mass wedding nga gipasiugdahan sa Kagamhanan sa Siyudad sa Sugbo ug didto kini gipahigayon sa Cebu Metropolitan Cathedral.
Samtang sa karong semanaha, dugang hugna sa mass wedding ang pagahimoon.
Nasayran nga gibahin-bahin kini sa upat ka hugna aron dili maghuot ug mamintinar ang social distancing sud sa simbahan.
Moabot ngadto sa 150 ka paresan ang gipaabot nga magpakasal nga na-enrol sa maong programa karong buwana.
Gitugyanan sa kagamhanan alang sa maong proyekto mao ang Cebu City Women and Family Affairs Commission nga gipanguluhan ni Alfie Ayuman.
Sa unang hugna, upat ka mga pari ang ni-officiate sa mass wedding nga gilangkoban nila ni Msgr. Camelo Alia, Msgr. Raul Go, Father Glenn Guanzon, ug Father Isias Gerale.
Ang siyudad maoy niabaga sa gastohan sa mga nagpakasal samtang ang Diagold maoy mi-sponsor sa ilang mga wedding rings.
Nitambong sa maong kalihokan sila si Konsehal Raymond Garcia, Konsehal Donaldo Hontiveros, Konsehal Jerry Guardo, ug Konsehal Niña Mabatid.
Pagkahuman sa seremonya, wala ra’y party sanglit nagpadayon pa man ang pandemya.
Hinuon ang mga kinasal gipabawnan sa kagamhanan og regalo nga inasal, bugas, ug cake, ug dugang regalo gikan nilang Mayor Edgardo Labella, Bise Mayor Michael Rama ug ubang opisyales sa siyudad. MEL (BANATNEWS)
- Latest
