Legislative report ni Bucao giyam-iran?

CEBU, Philippines — Nagkalain-laing reaksyon ang nadungog human sa pagpamati sa legislative report ni Talisay City Bise Mayor Alan Bucao.

Adunay mga nakauyon apan aduna say wala ug nakaingon nga “show” kadto sa bise mayor kay siya raman ang bida.

Si Dexter (di tinuod nga pangan) niingon nga nindot ang gibuhat sa bise mayor aron mahibawo ang Talisaynon kung unsa ang nabuhat sa konseho sa pakigbatok sa pandemya. Apan ang tanan nga nahimo sa konseho daw giangkon ra tanan sa bise mayor.

Aduna sab kini presentasyon sa iyang mga slide shows nga naobserbahang siya lang gyud pirme ang bida. Matud pa niya nga nagpakahilom lang ang konseho pero nasakitan sa iyang gihimo nga report.

Nahimo sab kini nga sumsoman sa mga balhibuon og baba nga mao na ba gyud kadto ang pagbadlis ni Bucao nga modagan pagkamayor sa Talisay ug mobuwag sa grupo sa Alayon.

“Pasumbingay ug panamilit man ‘to iyaha. Nagsige nalang og pasumbingay nga wa ta mahibawo sa umaabot unya nagsige og pasalamat nga unta naa pa man daghang sesyon,” matud pa sa kasaligang tinubdan nga nakahinabi sa Banat News.

Apan si Bucao miingon nga walay pamolitika ang iyang gihimong report inay naghisgot lang sa pagpadayon sa ilang maayo nga nasugdan nga kalambuan sa konseho kay aduna paman sobra nga 10 ka buwan nga mopakita sa ilang serbisyo sa dili pa moatubang pagbalik sa katawhan aron sila husgahan pinaagi sa piniliay kung angayan ba og dili nga tagaan sila og laing mandato.

“Kung ganing gilain og sabut sa uban...ila sad na,” matud pa ni Bucao. Dugang pa ni Bucao nga di siya modagan pagkamayor sa siyudad ug ang nanggawas nga estorya way kamatuoran. Ang pagduso sa sertipiko de kanditatura mahitabo na sa sunod nga buwan. (BANAT NEWS)