Talisay nakahimo na og 300 ka nitso

CEBU, Philippines — Niabot na sa 300 ka nitso ang nahimo sa kagamhanan sa Dakbayan sa Talisay diha sa pampublikong sementeryo sa Barangay Poblacion.

Kini maoy gibutyag ni Gary Togonon, pangulo sa Aksyon Agad Team.

Gani ang 100 ka nitso nga nahimo niadto lang buwan sa Mayo niining tuiga paspas kini nga nagamit. Matud ni Togonon nga pinaspasay ang ilang paghimo sa dugang pa nga nitso tungod kay dili moubos sa 15 ka patay’ng lawas ang ilubong matag semana.

Niining panahon sa pandamiya kasagaran nga rekomendasyon ilubong dayon ang minatay.

Samtang si Dr. Lino Alanzado, pangulo sa City Health Office nagkanayon nga adunay higayon nga ang silingang siyudad ug lungsod anha  sa Talisay molubong sa ilang patay.

Si Togonon nagkanayon nga aduna pay luna nga mahimong butangan og mga nitso.

Ang siyudad nanghinaot nga unta molurang na ang sitwasyon nga nasinati karon.

Gipasalig sa siyudad nga ang mga Talisaynon dili na maproblema sa pagpalubong sa ilang minatay. BDB (BANATNEWS)