CEBU, Philippines — Usa ka manhunt operation batok sa usa ka detainee sa Mabolo Police Station sa Dakbayan sa Sugbu human kini nakaeskapo nga nakaposas pa niadtong adlaw nga Huwebes sa udto.
Ang hepe sa Mabolo Police Station nga si Police Major Francis Renz Talosig miila sa nakaeskapo nga si Noeh Abarca Niez, alyas Nowe, 25, residente sa Sitio Ponce 1, Barangay Carreta ning dakbayan.
Matud pa ni Talosig nakaeskapo si Niez samtang pabalik na sila gikan sa Regional Crime Laboratory Office sa may Sitio Sudlon Brgy. Lahug alang sa iyang medical checkup tungod kay rekisitos kini aron siya mabalhin na sa Cebu City Jail sa Barangay Kalunasan.
Apan pagabot sa may MJ Cuenco Avenue nahunong ang patrol car tungod sa traffic tungod kay dunay sakyanan nga kalit nga mi u-turn .
Pag-aksyon og hunong sa patrol car nikalit og abli sa pultahan ang suspetsado kay wala man kini ma lock ug dali kining nidagan padulong sa Sitio Upper Carreta sa luyo sa Ludo nga sam-ang.
Ang maong nakaeskapo adunay kaso nga murder, Section 5 ug 11 sa RA 9165, RA 10591 illegal possession of firearms.
Nadakpan usab si Niez og kasong theft niadtong 2013 ug 2015 sa robbery. Matud pang Talosig notadong badlungon ang paghulagway sa mga silingan sa suspek kaniya.
Dugang pa ni Talosig, ang maong nakaeskapo niangkon kanila nga maoy nipatay sa usa ka construction worker duol sa Queen City Cemetery niadtong nilabay nga Hulyo 13 ning tuiga. —/IBM (BANAT NEWS)