CCTO nipahugot sa pagbantay sa pampublikong sakyanan

CEBU, Philippines — Gipahugtan sa Cebu City Transportation Office (CCTO) ang pagbantay ug pagpanakop sa mga overloaded nga pampublikong sakyanan gumikan sa nagsakang kaso sa COVID-19 sa Siyudad sa Sugbo.

Nasayran nga 80 porsyento lang sa ilang kapasidad ang gitugot nga pasahero sa pampublikong sakyanan ug adunay mga barrier nga ibutang taliwala sa mga pasahero.    

Ang CCTO niawhag kini sa katawhan nga magmatngon kanunay aron dili mataptan sa virus ug motuman sa health protocols sama sa pagsul-ob og face mask, paghugas sa kamot ug physical distancing ilabi na diha sa pampubliko nga sakyanan diin dili na lang ipugos og sakay kong makita nga puno na kini.

Ang katawhan kinsa wala pa makapabakuna giawhag usab kini nga magpabakuna na aron adunay panagang batok sa virus.

Samtang sa Dakbayan sa Talisay ipadayon usab ang istrikto nga pagpatuman sa health protocols human nga padayong nagsaka ang kaso sa COVID-19 sa siyudad.

Si Mayor Gerald Anthony “Samsam” Gullas Jr. nipatawag og dinaliang tigom uban kang retired general Cecil Ezra Sandalo, Police Lieutenant Colonel Gerard Ace Pelare ug Jonathan Tumulak, hepe sa City of Talisay-Traffic Operations and Development Authority.

Gihisgotan nila ang hugot nga pagsunod sa pagsul-ob sa face mask, gidaghanon sa tawo nga makasulod sa establishemento, gidaghanon sa pasahero sa pampublikong sakyanan, curfew ug uban pa.

 “As the economy opens people have continue to go out. But let’s not forget that COVID is still around and we still need to maintain our respective minimum health protocols”, matud ni Gullas.

Ang CT-TODA naghimo usab sa random nga pagpangsita sa mga pampublikong sakyanan nga wala nituman sa health protocols.

Niadtong niaging semana usa ka bus ang ilang gipara tungod kay nisobra na ang gidaghanon sa mga tawo nga gipasakay ug nawagtang na ang social distancing. Gabriel C. Bonjoc/BDB (BANATNEWS)